Tótenshe jaǵdailar ministri Aqmola oblysynyń Arshaly jáne Tselinograd aýdandaryn aralap shyqty, dep habarlaidy "Ult aqparat".
Vedomstvonyń baspasóz qyzmetiniń málimetinshe, ministr Esil ózenindegi, Astana sý qoimasyndaǵy, Astana kontrrettegishindegi, Jibek Joly aýylyndaǵy, 42 razezdegi sý tasqyny jaǵdaiymen tanysty.
Ushý barysynda atalmysh aýdandarda qar basyp jatqany baiqaldy. Astana sý qoimasy men Esil ózeniniń akvatoriiasynda muz áli erimegen. Sý qoimasynda aǵys baiqalmaidy. Muz júrý qaýpi ázirshe joq.
Qazgidromettiń daýyldy eskertýine sáikes, 2-6 sáýir aralyǵynda Batys Qazaqstan, Aqtóbe, Qostanai, Qaraǵandy jáne Soltústik Qazaqstan oblystarynyń ózen basseinderinde oń aýa temperatýrasynyń saqtalýy men odan ári artýynyń boljamyna bailanysty qarqyndy qar erýi, erigen aǵyn qalyptasýy, muz qubylystarynyń álsireýi jáne ózenderdegi sý deńgeileriniń kóterilýi kútiledi.
"Qazgidromet" RMK ǵaryshtyq monitoringiniń derekteri boiynsha respýblikada qar jamylǵysynyń aýdany – 45%. Qazirgi ýaqytta Qaraǵandy jáne Batys Qazaqstan, Aqtóbe, Shyǵys Qazaqstan, Pavlodar oblystarynyń ońtústik aýdandarynda jáne Qyzylorda, Mańǵystaý, Atyraý, Almaty, Jambyl, Túrkistan oblystarynyń barlyq derlik aýmaǵynda qar jamylǵysy joq.
