Eńbek jáne halyqty áleýmettik qorǵaý ministri Mádina Ábilqasymova kópbalaly analarǵa memleketten qandai kómek kórsetilip jatqanyn aitty, dep habarlaidy Sputnik Qazaqstan tilshisi.
Ministr memlekettik qoldaý sábi dúniege kelgen sátten bastap kórsetiletinin atap ótti. Ol bala týǵanda beriletin birjolǵy járdemaqydan bastalady.
"Jyl saiyn elimizde 400 myń náreste ómirge keledi. Máselen, byltyr 391 myń bala dúnie esigin ashty. Birinshi, ekinshi jáne úshinshi bala týǵanda beriletin birjolǵy járdemaqy 95 950 teńgeni quraidy. Otbasynda tórtinshi jáne odan da kóp bala dúniege keletin bolsa, bul járdemaqynyń mólsheri 159 myń teńgege artady", — dedi Ábilqasymova úkimet kýlýarynda.
Ol áleýmettik járdemaqynyń ekinshi túri bir jasqa deiingi bala kútimine bailanysty tólenetinin aitty.
"Ol bir jylǵa deiin aiyna ortasha 14,5 myńnan 20,5 myń teńgege deiin tólenedi. Anasy ne ákesi jumys istep, olardyń atyna mindetti meditsinalyq saqtandyrý qoryna áleýmettik aýdarym tólengen bolsa, olarǵa qordan ortasha eseppen 32 myń teńge beriledi", —dep túsindirdi Ábilqasymova.
Ministrdiń aitýynsha, búginde elimizde 300 myńnan astam kóp balaly ana zeinetke erte shyqqan.
"Materialdyq qoldaýdan bólek, bizde kóp balaly analar úshin zeinetke erte shyǵý múmkindigi qarastyrylǵan (bes jáne odan da kóp balasy barlar). Iaǵni, olar zeinetke 53 jasynda shyǵý quqyǵy bar az sanattardyń biri. Búginde 332 myń áiel osy quqyqty paidalanǵan", — deidi vedomstvo basshysy.
Budan bólek, ol analardyń eńbek quqyǵy qorǵalǵanyn, iaǵni jumys berýshi júkti áieldiń, úsh jasqa deiingi, segiz jasqa deiingi balasyn tárbielep otyrǵan jalǵyzbasty analardyń eńbek shartyn buzýǵa quqyǵy joq ekenin atap ótti.
