Astana Media Week 2020 sharasynyń «Mýltiplatformalylyq» plenarlyq sessiiasynda Reseilik «TASS» AA bas direktorynyń orynbasary Mihail Gýsman aqparat taratý kezinde qandai máselelerge nazar aýdarylýy kerektigin aityp berdi, dep habarlaidy QazAqparat.
«Aqparattyq múmkindikter keńeiip keledi. Óte kóp syn-tegeýrin paida boldy. Biz óz jumysymyzdy jańa tehnologiialardyń múmkindikterine beiimdep, múmkindiginshe bul jumysty birlese otyryp júrgizýimiz kerek. Syn-tegeýrinderge óz jumysymyzben jaýap berýimiz kerek. TASS agenttigi Reseidegi memlekettik aqparattyq agenttik retinde barlyq tanymal platformalarda jumys isteidi. Telegram arnadan bastap Iýtýbqa deiin barlyq platformada barmyz. Áitse de buǵan kóńil toq bop otyra berýge bolmaidy. Zamannyń jańa talaptary jańa syn-tegeýrinder men qiyndy qtardy da ákelýde. Olar jańasha jaýapty talap etedi», - dedi Mihail Gýsman.
Onyń aitýynsha qazirgi ýaqytta aqparattyq salada jumys isteitin mamandar aýditoriiaǵa qatty yqpal etedi.
«Feik jańalyqtar týraly aityp jatyrmyz. Álbette kez kelgen ondai jańalyqtyń artynda bir adam nemese top, tipti bir memlekettik mehanizm turýy múmkin. Másele onda emes. Másele oǵan qalai qarsy turý kerek? Jalǵan aqparattyń aǵynynda shynaiy aqparatty jalǵan málimetten qalai ajyratyp alýǵa bolady? Búgingi kúni osy jolda «aqparat keńistiginde jumys isteitinder tabysqa jetti» dep aita almaimyn. Sondyqtan, kásibi árekettestik kerek. Tájiribemen bólisý óte mańyzdy», - dedi ol.
Mihail Gýsman qazirgi ýaqytta tilshiler aýditoriiaǵa aqparatty ártúrli formada jetkize alatynyn málim etti.
«Alaida jalǵan aqparattyń keńistigimizge kirip ketýimen únemi kúresýimiz kerek. TASS agenttiginiń tájiribesi týraly aitar bolsaq, eń basty quralymyz – bizdiń tilshilerimizge degen senim. El ishinde de, shetelde de jumys istese de tilshilerimiz eń negizgi ári senimdi aqparat kózine ainalýy úshin barynsha kúsh salady. Bizdiń qyzmet jańalyqty taratyp qana qoimai, ol faktilerdiń rastalýyn da qadaǵalaidy. Jyldamdyq – aqparat agenttikteriniń eń mańyzdy faktorlarynyń biri. Áitse de agenttiktiń ishinde áriptestermen pikir almasqan kezde men «eń aldymen jyldamdyqtan góri shynaiylyqqa kóp mán berilýi kerektigine» basa nazar aýdaramyn. Jańalyqty kishkene keshiktirip berýge bolady. Biraq ol shynaiy aqparat bolýy tiis», - degen Mihail Gýsman 116 jyldyq tarihy bar TASS agenttiginiń aqparat taratýda basty ustanatyn erejeleriniń biri shynaiylyq ekenin jetkizdi.
Aita ketsek, eloradada Astana Media Week 2020 media aptalyǵy ótkizilýde. Is-sharanyń negizgi maqsaty – otandyq mediasalany damytý men indýstriiadaǵy iskerlik qarym-qatynasty aimaqtyq jáne halyqaralyq deńgeide ilgeriletý. Media aptalyq tórtinshi jyl qatarynan álemniń túpkir-túpkirinen jetekshi sarapshylardy dástúrli túrde jinap keledi jáne ózekti taqyryptar talqylanady.
