27 naýryz kúni Qyzylorda oblysynda apatqa ushyraǵan Mi-8 tikushaǵyndaǵy bes áskeri - Taldyqorǵan qalasynyń týmalary. Olar biyl qańtar aiynda ǵana Aqtaý qalasyna aýysypty. Aǵa serjant Murat Sharipov 40 jasta, kishi serjant Ashat Abdýlmanat 37 jasta, efreitorlar Miras Jumataev 28 jasta, Qýanysh Sarqytbaev 33-te, Aidyn Ábdildanov 41-de eken. Sondai-aq, 25 jastaǵy leitenant Aslan Aitbaev Almaty oblysyndaǵy Saryózek aýylynyń týmasy, dep jazady "Jas Alash" gazeti.
Apatqa ushyraǵan tikushaqta bolǵandardyń biri — 37 jastaǵy taldyqorǵandyq kishi serjant Ashat Abdýlmanat. 15 jyl otasqan jubaiy Elvira ABDÝLMANAT pen týǵandary qazir qaiǵydan qan jutyp, áli de es jiia almai otyr. Marqumnyń artynda 4 balasy qaldy. Úlkeni 8-synypta oqysa, kenjesi endi ǵana 4-ke tolǵan. Ashat Abdýlmanat biraz jyl boiy Taldyqorǵan qalasyndaǵy áýe bazasynda kelisim-shart negizinde jumys istegen eken.
«Mine ushyp kele jatyrmyz dep videosyn jibergen. Sodan keiin habarlaspai qoidy, zvondasaq almaidy. Keshki saǵat 11-de kelip habarlap ketti áskeri adamdar. Senbeimin áli, senbeimin balamnyń ólip qalǵanyna. Aqtaýǵa aýystyrdy dep qańtardyń 1-inen bastap ketken. Sodan, mine, ar jaǵy eki-aq aidyń ishinde armany men maqsatyna jete almai ketti ǵoi, qulynym. Qaitem endi?!», — deidi qan jutqan ana Saqysh BAIMÝRZINA (marqum Ashat Abdýlmanattyń anasy).
Al, 28 jastaǵy efreitor Miras Jumataevtyń týǵandary onyń ómirde joqtyǵyna áli sene almai, óń men tústiń arasynda otyrǵandaryn aitady. Ǵalamtorda alǵash taraǵan marqumdar tiziminde onyń familiiasy Jumataev emes, Jumatov dep jazylǵanyn kóripti. Sóitip, múmkin tiri shyǵar degen úmit qylań berdi deidi.
«Samoletterdi jasap, qarap júretin. Jumysy sol. Karaýlǵa barady. Jańaǵy internetten oqyǵanda komandirlerdiń aty, janyndaǵy balalardyń aty bar. Biraq onyń initsialy kep tur, al familiia durys jazylmapty. Sol kezde Miras aman shyǵar degen úmit boldy», — deidi marqum Miras Jumataevtyń baýyry Aidyn JYLQAIDAROV.
Marqummen týǵandary apatqa ushyraǵan kúni keshki 5-ter shamasynda sońǵy ret bailanysqa shyqqan eken. «Aman-esen Aqtaýdan ushyp shyqtyq» degen ulynan odan keiin esh habar ala almaǵan. Anasy jumys aýystyrar sátte ulynyń Aqtaýǵa barǵysy kelmegenin aitady.
Sailaý SYDYQOVA, marqum Miras Jumataevtyń anasy: «Bar senimimiz balalar aman shyǵar dep oiladyq. Balam Aqtaýǵa óz erkinen tys ketip edi. Barǵysy kelgen joq Aqtaýǵa. Meniń de jibergim kelgen joq».
Tikushaq apatynan qaza tapqandardyń biri — 40 jastaǵy aǵa serjant Murat Sharipov. Tilshilerge suqbat berýden bas tartqan marqumnyń týǵandary onyń sońǵy ret Taldyqorǵanǵa 22 naýryzda kelgenin aitady. Artynda jesiri men 4 balasy qaldy. Marqumdardyń týǵandary arýlap aqtyq saparǵa shyǵaryp salý úshin uldarynyń súiegin kútip otyr.
Aita keteiik, Qorǵanys ministri Nurlan Ermekbaev apattyń saldary anyqtalatynyn, tergeý jumystarynyń júrgiziletinin málimdegen edi jáne marqumdardyń otbasyna qarjylai kómek te beriletinin jetkizgen.
Prezident Qasym-Jomart Toqaev ta qara jamylǵan áskerilerdiń otbasyna kóńil aitty.
