Tanymal ánshi Meirambek Besbaev Májilis depýtaty Zaǵipa Balieva jumysyna kedergi keltirip, qysyp kórsetip jatqanyn aitty. Bul týraly ol Instagram jelisindegi paraqshasynda jazdy.
Osyǵan deiin ánshiler biraýyzdan daýys berip, Meirambek Besbaevty Qazaqstan oryndaýshylar odaǵynyń basqarma tóraǵasy etip sailaǵan bolatyn.
"Qurmetti, Zaǵipa Iahiiaqyzy! Men 2020 jyldyń 15 qańtary kúni Qazaqstan oryndaýshylar odaǵynyń basqarma tóraǵasy bolyp sailandym. Daýys berýge uiymnyń eń joǵarǵy basqarý organy – quryltaishylardyń jalpy jiyny jasaqtaǵan basqarma músheleriniń barlyǵy qatysty. Sailaý ótkizýge qajetti kvorým boldy. Barlyq reglament pen zańdylyq tolyqtai saqtaldy. Hattama toltyrylyp, meni bas direktor qyzmetine kirisýim týraly buiryq ta shyǵyp qoidy", - deidi "MýzArt" tobynyń múshesi.
Ánshiniń pikirinshe, Májilis depýtaty Zaǵipa Balieva men onyń uly jumysyna kedergi keltirip jatyr.
"Endi kelip, burynǵy basshylyq jańa basshylyqqa qarsy qoqań-loqqy kórsetip, ártúrli jaǵymsyz áreketter arqyly qarsylyq kórsetýde. Burynǵy basshylyqtyń artynda sizdiń ulyńyz jáne ózińiz tur ekensiz. Siz zańdy túrde sailanǵan maǵan, basqarma múshelerine qysym kórsetip, ártúrli memlekettik jáne quqyq qorǵaý organdaryna telefon shalyp jatyr ekensiz. Munyńyz múlde durys emes dep bilemiz!", - dedi Meirambek Besbaev.
Ol depýtattyń áreketin túsinbeitinin, ánshiler adal eńbegimen tapqan aqshasyn alýy qajet ekenin atap ótken. Sondai-aq Besbaev Zaǵipa Balievadan mundai áreketti toqtatýdy talap etti.
"Nege siz ánshilerdiń sharýasyna aralasyp, alashapqyn bolyp jatyrsyz?! Biz sony túsinbei otyrmyz. Bul áreket-qylyǵyńyz sizdei úlken memleket qairatkerine jaraspaityn sharýa. Ánshilerge tiesili aqshaǵa tek sizdiń balańyz ielik etý kerek degen oi sizge qaidan kelgen?! Biz óz sharýamyzdy ózimiz sheshýimiz kerek, ózimizge tiesili qarajatty ózimiz tiisinshe jumsaýymyz qajet. Eńbekten túsken qarajat bir qaltaǵa, naqtyraq aitqanda, sizdiń balańyzǵa emes, myń qaltaǵa iaǵni mańdai terimen taýyp júrgen ánshiler men án óndeýshilerdiń qaltasyna túsý kerek. Sizden osyndai áreketterińizdi toqtatýdy talap etemiz!", - dep túiindedi sózin ánshi.
