Almatydaǵy ortalyq referens-zerthananyń qyzmeti men meningittiń taralýy arasynda eshqandai bailanys joq. Bul týraly QR densaýlyq saqtaý ministri Eljan Birtanov málimdedi, dep habarlaidy Sputnik Qazaqstan tilshisi.
Birtanov ortalyq referens-zerthana Qazaq zoonetikalyq aýrýlar institýtynyń bazasynda jumys isteitinin aitty. Atalǵan ǵylymi ortalyqtyń ashylǵanyna biraz bolǵan, onda osy ýaqyt boiy Qazaqstan aýmaǵynda taralǵan asa qaýipti infektsiialardyń shtammdary saqtalǵan.
"Shynymen de, amerikalyq áriptesterdiń kómegimen qaýipsizdigi joǵary zamanaýi zerthana salyndy. Endi sol shtammdar qaýipsiz jerde saqtalady. Meningit shtammyna qatysty aitar bolsam, bul halyq arasynda kúndelikti ainalyp júretin shtammdar. Olar zerthanada saqtalýy tiis asa qaýipti infektsiia sanatyna jatpaidy. Atalǵan referens-zerthanada virýs taralatyndai tótenshe jaǵdai bolǵan joq", — dedi Birtanov Astanada ótken baspasóz máslihatynda.
Aita ketsek, Almatydaǵy ortalyq referens-zerthanada oba, Sibir jarasy, brýtsellez sekildi asa qaýipti juqpaly aýrýlar, sońǵy jyldary shet memleketterde paida bolǵan Ziko, Mers jáne Ebola syndy virýstar da zertteledi. Asa qaýipti patogender zerthanada barlyq halyqaralyq jáne otandyq standartpen saqtalady.
Jyl basynan beri respýblikada 58 adam meningitpen tirkeldi, onyń arasynda 18 naýqas – 14 jasqa deiingi balalar. Atalǵan aýrýdan 12 adam kóz jumdy, olardyń ishinde beseýi – 14 jasqa deiingi balalar.
Óńirler arasynda meningit juqtyrǵandar sany eń kóp Almatyda tirkelgen – 32 adam, Aqmola oblysynda – 2, Aqtóbe – 3, Almaty oblysynda – 4, ShQO – 4, Jambyl, Qaraǵandy, Qyzylorda oblystarynda – 1, Pavlodar – 2, OQO men Astanada – 4.
