Qazaqstanda aýyr dertke shaldyqqan balalardyń armanyn oryndaityn arnaiy qor quryldy, dep habarlaidy "Ult aqparat".
«Menin Armanym» korporativti qorynyń 3 ailyq jumysy barysynda 120 ótinish qaralǵan.
Búginde 13 balanyń armany oryndaldy.
«Qazaqstanda aýyr dertten ǵumyry sanaýly on myńdaǵan bala bar. Jobamyzdyń maqsaty – balalardyń osy ómirdegi armanyn oryndaý. Naýqas balalar aýrýhanalarda surqai qabyrǵalardyń ortasynda kóp ýaqytyn ótkizedi. Olardyń ólsheýli ǵumyrynda rýh berý, aýyr meditsinalyq protsedýralardan bir mezgil kóńilin aýlaý maqsat bolyp otyr. Bizdiń qor 3-18 jas aralyǵyndaǵy balalardyń armanyn oryndaýǵa tyrysady. Búginde 13 balanyń armanyn oryndadyq», - deidi qordyń atqarýshy direktory Shamil Vankeev.
Joba avtorlarynyń aitýynsha, balalardyń armany kóp.
Bireý zoobaqqa barǵysy keledi, ekinshi bala basqa qalalardy arala ǵysy keledi. Súiikti sportshysymen, ánshisimen kezdesip, qoltańba alǵysy keledi.
«Biz barynsha balalardyń armanyn oryndaýǵa tyrysamyz. Az ýaqytqa bolsyn, politsiia qyzmetkeri, sýperbatyr bolýǵa múmkindik beremiz», - dedi ol.
Máselen, 4 jasar Miras - óziniń dertine qaramastan óte belsendi, kóńildi bala. Oǵan «Marvel» kinoálemi unaidy. Miras sýperkeiipkerlermen kezdesýdi armandaidy.
«Qor komandasyna alǵys aitqym keledi. «Menin Armanym» qorynda jas balalar jumys isteidi. Olar da - bireýdiń balalary. Olar ómirin basqa arnaǵa bursa da bolar edi. Biraq, tańdaýy basqa. Osyndai meiirimdi balalardy tárbielegen ata-anasyna alǵysym sheksiz», - deidi Mirastyń anasy Áigerim Ýrazalieva.
Eriktilerdiń qoldaýynyń arqasynda qor Qazaqstan boiynsha bólimshelerin ashyp jatyr. Sáýirdiń sońyna deiin Qazaqstan boiynsha 15 bólimshe ashý josparda bar.
«Bizdiń qor emdeýge aqsha jinamaidy. Jumys bastalǵaly beri eriktilerden 300 jýyq ótinish túsken. Bizdiń qorda kez kelgen adam jumys istei alady», - dedi Shamil Vankeev.
