Áleýmettik jelide Magnum E-commerce Kazakhstan kompaniiasynyń qyzmetkeri basshylyqqa úndeý jasap, jumys ornynda bolǵan daýly jaǵdai týraly málimdedi, dep habarlaidy ult.kz.
Qyzmetkerdiń aitýynsha, oqiǵa 19 shilde kúni jumys aýysymy kezinde bolǵan. Ol tapsyrystardy jinap júrgen sátte kýrerlerdiń biri ózin uialy telefonǵa birneshe ret túsirip júrgenin baiqaǵan. Onyń sózinshe, túsirilim óz kelisiminsiz jáne ádeii jasalǵan.
Osydan keiin ol aǵa kýrerge shaǵymdanyp, ekeýi birge beinebaqylaý kameralarynyń jazbasyn qaraǵan. Qyzmetkerdiń aitýynsha, beinejazba onyń sózin rastaǵan. Aǵa kýrer atalǵan qyzmetkerdiń áreketine qatysty shara qoldanylyp, jumystan shyǵarylatynyn aitqan.
Alaida kelesi kúni jaǵdai kútpegen jerden ózgergen. Avtordyń sózinshe, basshylyq kýrerdiń áreketin emes, ózin kinálaǵan.
«Direktor meniń tárbiemdi, syrtqy kelbetimdi jáne kiimimdi talqylai bastady. Bul máselege esh qatysy bolmasa da, maǵan dóreki sóilep, qysym kórsetti», – deidi ol.
Onyń aitýynsha, ózin ruqsatsyz videoǵa túsirgen kýrer jumysyn jalǵastyrǵan, al ózi eshqandai zańdy túsindirmesiz jumysqa jiberilmegen.
Úsh jyldan beri kompaniiada eńbek etip kele jatqanyn aitqan qyzmetker bul jaǵdaidan keiin áleýmettik jeli arqyly kompaniianyń Almatydaǵy basshylyǵyna úndeý joldaǵan. Ol jariialaǵan jazbasynda erekshe jeńildik nemese artyqshylyq suramaitynyn, tek oqiǵaǵa qatysty beinebaqylaý jazbalary tekserilip, ádil sheshim qabyldanýyn qalaitynyn jetkizdi.
Áleýmettik jelide taraǵan Magnum E-commerce Kazakhstan qyzmetkeriniń shaǵymyna kompaniia resmi pikir bildirdi.
Kompaniianyń málimetinshe, qyzmetkerdiń ótinishi kelip túsken sátten bastap qaýipsizdik qyzmetiniń qatysýymen qyzmettik tekserý bastalǵan.
«Oqiǵanyń barlyq mán-jaiyn jan-jaqty qarastyrý úshin belgili bir ýaqyt qajet. Qazirgi tańda bolǵan jaǵdaidyń barlyq deregi tekserilip jatyr», – delingen kompaniianyń jaýabynda.
Sondai-aq Magnum tekserý aiaqtalyp, tiisti sheshim qabyldanǵannan keiin ótinish iesimen jeke habarlama arqyly bailanysqa shyǵatynyn málimdedi.
