Almatyda elimizdiń Tuńǵysh Prezidenti kúnine arnalǵan «Men jastarǵa senemin!» VIII Respýblikalyq jastar forýmynyń jeńimpazdaryn marapattaý rásimi ótti, dep habarlaidy "Ult aqparat".
Biylǵy jyly innovatsiia jáne shyǵarmashylyq, jasampazdyq prizmasy arqyly patriotizmdi damytýǵa baǵyttalǵan baiqaý onlain formatta uiymdastyryldy.
Ál-Farabi atyndaǵy QazUÝ respýblikalyq jastar forýmyn QR Tuńǵysh Prezidenti kúnine arnap 2013 jyldan beri ótkizip keledi. Biyl shara sáýir aiynan bastaý alyp álemdik pandemiiaǵa bailanysty onyń barlyq kezeńderi onlain rejimde ótti. Jyl saiynǵy forýmǵa qatysýshylar kelesi baiqaýlar boiynsha baq synasty: «Men óz elimniń órkendeýi úshin ne istei alamyn» úzdik esse, «Elimizdiń innovatsiialyq damýyna qosqan naqty úlesim» atty úzdik innovatsiialyq joba; «Men jastarǵa senemin!» azamattyq-patriottyq baǵyttaǵy poeziialyq shyǵarma jáne «Máńgilik el muratym!» avtorlyq patriottyq ánder, «Sanaly urpaq» parasattylyq printsipterin nasihattaityn úzdik joba.
Forým keńinen tanylyp, damyp keledi, onyń nominatsiialarynyń tizimi jyl saiyn jańartylýda. Ábý Nasyr Ál-Farabidiń 1150 jyldyǵy men Eriktiler jylynda ony «Qaiyrymdy qoǵam» stýdenttik qaiyrymdylyq jobasynyń baiqaýy tolyqtyrdy. Sonymen qatar, forýmnyń men_jastarga_senemin_kaznu instagram-akkaýntynyń oqyrmandary men kórermender anyqtaityn «Kórermender kózaiymy syilyǵy» nominatsiiasy taǵaiyndaldy.
Forýmǵa qatysý úshin elimizdiń barlyq aimaqtarynan 5 myńǵa jýyq stýdent tirkeldi. Shyǵarmashylyq jobalar men beine prezentatsiialardy bedeldi sarapshylar – qoǵam qairatkerleri, biznes ókilderi, memlekettik organdar, mádeniet jáne óner qairatkerleri men ǵalymdardan jinalǵan táýelsiz qazylar alqasy baǵalady. Nátijesinde 300 úzdik joba sońǵy týrdyń finalyna ótti.
QazUÝ rektory akademik Ǵalym Mutanov forýmnyń finalisterin qarsy ala otyryp, olardyń táýelsiz Qazaqstannyń bolashaǵy ekenin atap ótti. Naq osy jas urpaqtyń aldynda jasampaz ister estafetasyn jalǵastyrý jáne eldiń órkendeýin qamtamasyz etý mindeti tur.
«Mundai missiiany tek patriotty, deni saý jáne adamgershilik turǵyda básekege qabiletti jáne áleýmettik jaýapty jastar ǵana júzege asyra alady. Sondyqtan árqaisyńyz eń aldymen, óz otbasyńyzdyń jáne eń bastysy, óz Otanyńyzdyń aldyndaǵy úlken jaýapkershilikti durys uǵynyp, túsinip, sezinýlerińiz kerek! Forým sizder úshin jańa jetistikterge bastaý bolady dep úmittenemin», - dep atap ótti rektor.
Baiqaý laýreattary men júldegerleri diplomdar jáne baǵaly syilyqtarmen marapattalady, al jeńimpazdar QazUÝ-da bir jyl tegin oqý grantyna ie boldy.
Úzdik stýdenttik innovatsiialyq joba baiqaýynda E.Bóketov atyndaǵy QarMÝ-den Pavel Ivachev jeńiske jetti. Qazylar alqasy Sh.Ýálihanov atyndaǵy Kókshetaý ýniversitetinen Qýandyq Serikovtyń jumysyn úzdik esse dep, al poetikalyq shyǵarmalar boiynsha H.Dosmuhamedov atyndaǵy Atyraý memlekettik ýniversitetiniń stýdenti Nurjol Jaqsylyqtyń týyndysyn úzdik dep tanydy. A.Baitursynov atyndaǵy Qostanai memlekettik ýniversitetinen Nikolai Iaroshenko avtorlyq patriottyq án baiqaýynda birinshi bolsa, S. Amanjolov atyndaǵy ShQMÝ-dyń stýdenti Didar Jarqyn «Sanaly urpaq» parasattylyq qaǵidattaryn ilgeriletý jobasymen úzdik dep tanyldy.
«Qaiyrymdy qoǵam» stýdenttik qaiyrymdylyq jobalar baiqaýynda Qazaq ulttyq qyzdar pedagogikalyq ýniversitetiniń stýdenti Nadyrhanova Diliara jeńiske jetti. Talantty jas kompozitor Rahat-Bi Ábdisaǵin uly oishyl ál-Farabidiń mereitoiyna arnap fortepiano men simfoniialyq orkestrge jazǵan «Qubylys» atty simfoniialyq poemasy úshin forýmnyń arnaiy diplomymen marapattaldy. Respýblikalyq forýmdy uiymdastyrýshy – ál-Farabi atyndaǵy QazUÝ nominatsiia laýreattary men baiqaýlardyń alǵashqy úsh oryn iegerlerine kelesi jyly ýniversitette ótetin jazǵy kóshbasshylyq mektebine qatysýǵa múmkindik berdi. «Men jastarǵa senemin!» VIII respýblikalyq jastar forýmynyń jeńimpazdaryn saltanatty marapattaý rásiminiń transliatsiiasyn AlFarabiTV YouTube arnasynan kórýge bolady.
