EXPO-2017 halyqaralyq kórmesi qarsańynda Nursultan Nazarbaev Astanadaǵy "Nurly jol" jańa temirjol vokzalynda bolyp qaitty, - dep habarlaidy "Ult aqparat" kaz.tengrinews.kz portalyna silteme jasap.
"Jýyrda EXPO ashylady, osyǵan bailanysty Astananyń jańa maqtanyshy bolatyn jańa nysandardy aralap júrmin. Bul burynǵy keńes elderi arasyndaǵy osyndai jalǵyz vokzal, men tipti Eýropada mundaidy kórgen joqpyn. Ol bolashaqqa arnalyp salynǵan. Qazaqstannyń barlyq óńirin "Talgo" júrdek poiyzymen bailanystyrdyq, olar saǵatyna 150-200 shaqyrym jyldamdyqpen júre alady. Buryn Almatydan 24 saǵatta jetetin bolsaq, qazir 11 saǵatta", - dedi Nazarbaev.
"Nurly jol" jańa vokzal kesheniniń jalpy aýmaǵy 126 myń sharshy metr, alty deńgeili ǵimarat. Ótkizý múmkindigi - táýligine 35 myń jolaýshy.
Birinshi jáne ekinshi qabat jer astynda, onda 740 oryndyq kólik turaǵy (vokzal ainalasynda taǵy 750 oryndyq turaq bar) jáne qyzmettik-tehnikalyq bólimder ornalasqan. Úshinshi qabattaǵy perronnyń tóbesi jabyq, aýa raiynyń kez kelgen qubylýynan qorǵaidy. Perronǵa bileti joq adamdar ótkizilmeitinin aita keteiik.
Tórtinshi qabatta kútý zaly, saýda dúńgirshekteri men kassalar ornalasqan. Besinshi qabatta tamaqtaný oryndary men qonaqúiler bar. Altynshy qabat qyzmettik paidalanýǵa berilgen.
"Vokzal qaýipsizdigine kóp kóńil bólingen, 510 baqylaý kamerasy, 16 tekserý orny "Áskerilendirilgen temirjol kúzeti" men politseler únemi saq júredi", - deidi QTJ ókili Juban Kórpebaev.
Aita keteiik, jańa vokzalda poiyz 1 maýsymda jolǵa qoilady.
.jpeg)