Búgin Astanadaǵy Ortalyq kommýnikatsiialar qyzmetinde «Qazaqstan» RTRK» AQ uiymdastyrýymen «Men qazaqpyn» atty halyqaralyq megajobaǵa bailanysty baspasóz máslihaty ótti.
Sharaǵa Memleket jáne qoǵam qairatkeri Myrzatai Joldasbekov jáne «Qazaqstan» RTRK» AQ Basqarma tóraǵasy Erlan Qarin qatysty.
Jobanyń maqsaty – elimizdiń túkpir-túkpirindegi dástúrli ánshi-termeshi, kúishilerdiń basyn bir arnada toǵystyryp, elimizdiń ár aimaǵynda qalyptasqan óner mektepteriniń tańdaýly týyndylaryn dáripteý maqsatynda atadan-balaǵa mura bolyp kele jatqan tól ónerimiz kúi, jyr-termeni damytyp, zamanǵa sai jańashalandyryp, óskeleń urpaqqa nasihattaý.
Aita keteiik, Qazaqstan Respýblikasynyń Aqparat jáne kommýnikatsiia ministrliginiń qoldaýymen «Qazaqstan» RTRK» AQ birlesip 2017 jyly «Men qazaqpyn» atty halyqaralyq televiziialyq megajobasyn júzege asyrǵan bolatyn.
«Qazaqstan» RTRK AQ Basqarma tóraǵasy Erlan Qarin: «Biyl, «Men qazaqpyn» jobasyna elimizdiń 14 aimaǵynan, 170 aýdan qatysady dep josparlanýda. Sondai-aq, ádettegidei sheteldegi qandastarymyzdy tartý úshin Reseidiń Astrahan, Mońǵoliianyń Baian-Ólgei jáne Qyrǵyzstanda uiymdastyrý jumystaryn júrgizetin bolamyz. Bul joba ulttyq tól ónerimizdi damytý ǵana emes, jańa esimder ashýmen qatar, elimizdegi ánshi-termeshiler men kúishilerdiń ónerin keńinen nasihattaý» - dedi.
Ótken jyly, bul aýqymdy jobaǵa 3000-nan astam úmitker ótinish bildirip, oblystyq irikteýge 700-dei adam qatysqan bolatyn. Al, Astanada ótken televiziialyq jobaǵa 57 ónerpaz baq synasyp, ónerlerin ortaǵa saldy. Úsh aiǵa sozylǵan televiziialyq baiqaýda ánshi, kúishi, termeshilerdiń úzdigin anyqtaýǵa qazylar alqasymen birge kórermender de daýys berý arqyly atsalysty.
Osylaisha, «Men qazaqpyn» megajobasynyń birinshi maýsymdaǵy shyǵarylymy Táýelsizdik kúni qarsańynda márege jetti. Jeńimpazdardy marapattaý Astana qalasy Ortalyq kontsert zalynda ótip, finalister jáne óner sheberleriniń qatysýymen gala-kontsert ótti.
Halyqaralyq deńgeide uiymdastyrylǵan «Men qazaqpyn» mega jobasyna ónerpazdardy tartý úshin shet elderge is-sapar uiymdastyrylyp, Qytai, Resei, Mońǵoliia elderinde turatyn qandastarymyz da ónerlerin kórsetýge múmkindik alǵan bolatyn.
Sondai-aq, joba aiasynda ár óńirdiń tarihyna, el ishindegi aǵaiynnyń turmys-tirshiligine bailanysty 20 film daiyndalyp, efirge shyqqan edi.
Aita keteiik, shyǵarmashylyq ujymnyń eńbegi laiyqty baǵalanyp biyl ótken «Tumar» Ulttyq televiziialyq baiqaýynda «Úzdik oiyn-saýyq joba» atalymyn jeńip aldy.
