Aqordada Qazaqstan Respýblikasynyń Memlekettik hatshysy Qyrymbek Kósherbaevtyń tóraǵalyǵymen Abaidyń 175 jyldyq jáne Ábý Nasyr Ál-Farabidiń 1150 jyldyq mereitoilaryn daiyndaý jáne ótkizý jónindegi memlekettik komissiialardyń otyrysy ótti, dep habarlaidy Aqordanyń baspasóz qyzmeti.
Otyrysqa qatysýshylar Qordai aýdanynda qaza bolǵandardyń otbasylaryna kóńil aitty, qalyptasqan jaǵdaidyń tezirek turaqtanýyna tilektestik bildirdi
Otyrysty ashqan Memlekettik hatshy Abaidyń 175 jyldyǵy men Ál-Farabidiń 1150 jyldyǵyn merekeleýdiń bastapqy saltanatty rásimderi Nur-Sultan jáne Almaty qalalarynda ótkizilgenin atap ótti.
Ol sondai-aq, uly oishyldar Abai men Ál-Farabidiń ulaǵatty muralaryn zerdelei kele, olardyń izgi ideialarynyń túpki negizi eldiń birligi men yntymaǵymen úndesetinin taǵy da dáleldep otyrǵanyn atap ótti. Abai óziniń «tolyq adam» tujyrymyn mura etse, Ál-Farabi «baqytqa jetý jolynda bir-birine qol ushyn beretin qoǵam – qaiyrymdy qoǵam» degen ósietin qaldyrdy. Abai men Ál-Farabi qaldyrǵan ádilettilik pen qaiyrymdylyqtyń ónegelik murattary Memleket basshysynyń «Halyq únine qulaq asatyn memleket» atty osy zamanǵy tujyrymdamasymen úilesedi.
Komissiia otyrysynda Memleket basshysy Q.Toqaevtyń halyqqa Joldaýy men «Abai jáne HHI ǵasyrdaǵy Qazaqstan» atty maqalasynda jańa mindetterdiń, onyń ishinde mereitoilyq is-sharalardyń baǵdarlary naqty belgilengenine erekshe nazar aýdaryldy. Atalǵan tapsyrmalar aiasynda memlekettik komissiialardyń músheleri men memlekettik organdar Abai men Ál-Farabidiń rýhani muralaryn nasihattaý barysynda ziialy qaýym ókilderiniń jáne basqa da otandastarymyzdyń buqaralyq aqparat quraldarynda keńinen jariialanǵan pikirleri men usynystaryn eskerýi tiis.
Otyrysta Mádeniet jáne sport ministri A.Raiymqulovanyń, Bilim jáne ǵylym ministri A.Aimaǵambetovtiń, Aqparat jáne qoǵamdyq kelisim ministri D.Abaevtyń, Syrtqy ister ministri M.Tileýberdiniń, L.Gýmilev atyndaǵy EUÝ rektory E.Sydyqovtyń, Ál-Farabi atyndaǵy QazUÝ rektory Ǵ.Mutanovtyń esepteri tyńdaldy.
Jiyn sońynda ortalyq jáne jergilikti atqarýshy organdarǵa mereitoilyq is-sharalardy ótkizý kezinde ysyrapshyldyqqa jol bermeý, olardy joǵary ideialyq jáne naqty qundylyqtarmen qamtamasyz etý jóninde tapsyrma berildi.
