Memleket tarapynan jasalǵan koronavirýspen kúres sharalary halyqtyń jaýapkershiligimen ushtasýy qajet. Bul pikirdi QR Prezidenti janyndaǵy Qazaqstan strategiialyq zertteýler institýty Halyqaralyq zertteýler bóliminiń basshysy Ásel Nazarbetova bildirdi, dep habarlaidy QazAqparat.
«QR Prezidenti Qasym-Jomart Toqaev eldegi pandemiiaǵa bailanysty oryn alǵan kúrdeli epidemiologiialyq jaǵdaiǵa orai halyqqa úndeý jariialady. Bul jalpy álem boiynsha koronavirýs taraýynyń báseńdemei otyrýyna da tikelei bailanysty qalyptasqan úrdis. Mamandardyń boljaýynsha jahandyq indetke ainalǵan Covid-19 sharyqtaý shegine áli jetken joq. Keibir elderde qaita órshý oryn alyp otyr. Sońǵy statistikaǵa júginsek, álem boiynsha virýsqa shaldyqqandar sany 12 mln adamǵa jetip, qaitys bolǵandar sany 540 myńnan asty», - deidi sarapshy.
Qazaqstanda da koronavirýs boiynsha statistika kúnnen kúnge ulǵaiyp, qoǵamnyń jáne halyqtyń zor alańdaýshylyǵyn týdyryp otyr. Ár otbasynda osy indet saldarynan qaiǵyǵa dýshar bolyp, jaqyndarynan aiyrylý faktileri tirkelýde. Osy oraida Memleket Basshysynyń sheshimimen 13 shilde – Ulttyq aza tutý kúni bolyp jariialandy.
«Bul óte oryndy sheshim dep qabyldaimyz. Qaza bolǵandardyń ishinde elimizge eńbegi sińgen qairatkerler, asyl azamattarymyz da bar. Solardyń esimin tizip, jadymyzda máńgi ustaiyq degen qoǵamdyq usynystar da quptarlyq. Elimizdegi Covid-19 indetimen kúresý sharalary barysynda jiberilgen kemshilikterdiń bolǵanyn, odan tiisti qorytyndylar shyǵarylatynyn Prezident jasyrmai, alapat indetpen kúrestiń jalǵasa beretinin nyq senimmen aitty. Memleket tarapynan jasalǵan indetpen kúres sharalary halyqtyń asqan jaýapkershiligimen ushtasýy qajet ekenin sońǵy ailardaǵy tájiribe anyq ańǵartyp otyr. Jaǵdaidyń ýshyǵýyna sebep bolǵan tek tiisti memlekettik organdar tarapynan jiberilgen qatelikter ǵana emes, halyq tarapynan bul máselege nemquraily qarap, bilikke degen senimsizdik bildirýiniń saldary. Oǵan qosa ulttyq mentalitetke tán ujymdyq psihologiia, týǵan-týysynyń qýanyshy men qaiǵysyna mindetti túrde ortaqtasý dál osy jaǵdaida elimizge keri áserin berip otyr», - dedi QSZI ókili.
Qazirgi ýaqytta Memleket basshysynyń tikelei baqylaýymen jaǵdaidy turaqtandyrý, dári-dármekpen ýaqtyly qamtamasyz etý, jedel meditsinalyq kómek berý, qosymsha aýrýhanalarda oryndar daiyndaý siiaqty túrli sharalar qarqynmen júrgizilýde.
«Buqaralyq aqparat quraldarynda berilip jatqan halyqqa túsindirý jumystary da tiisti deńgeide. Degenmen bul indetpen kúresý ár adamnyń jeke jaýapkershiligine, jaqyndaryna, ainalasyndaǵylarǵa qamqorlyǵyna, eldiń qaiǵysynan paida kórý úshin emes, kerisinshe alǵysyn alýǵa umtylýyna tikelei bailanysty», - dedi Ásel Nazarbaetova.
