Foto: freepik
Sybailas jemqorlyqqa qarsy qyzmet sońǵy 2 jylda memlekettik satyp alý salasynda 67 mlrd teńgeden astam somadaǵy biýdjet qarajatynyń tiimsiz jumsalýyna jol bermedi (2022 jyly - 29 mlrd teńge, 2023 jyldyń 10 aiynda - 38,4 mlrd teńge), - dep habarlaidy "Ult aqparat" agenttiktiń baspasóz qyzmetine silteme jasap.
«Antikor «Atameken» Ulttyq Kásipkerler palatasymen birlesip, «Biryńǵai satyp alý terezesi» aqparattyq júiesi arqyly baǵany kóterý turǵysynan satyp alý monitoringin júzege asyrady. Bul sharalar - memlekettik satyp alý salasyndaǵy jemqorlyq táýekelderin joiý jónindegi baǵyttardyń biri.
Tájiribege sáikes, keńse taýarlaryn, JJM, kompiýterlik tehnika men tamaq ónimderin satyp alý kezinde asyra silteý anyqtaldy. Kóp jaǵdaida zańbuzýshylyqtarǵa ákim apparattary, bilim berý jáne densaýlyq saqtaý uiymdary jol berdi», - delingen habarlamada.
Agenttik málimetinshe, búgingi tańda memlekettik satyp alý protsesine 18 myńnan astam tapsyrys berýshi jáne 80 myńǵa jýyq ónim berýshi tartylǵan. Eń kóp taralǵan qylmystyq shemalar - naqty jetkizýshilerdiń múddelerin qoldaý, tehnikalyq sipattamany qalyptastyrý, sondai-aq jalǵan aktilerge qol qoiý.
«Mysaly, Jetisý oblysynyń Sport basqarmasy naqty quny 4,5 mln teńge bolatyn bir ulttyq kiiz úidi 13 mln teńgege satyp alýdy josparlaǵan.
Sonymen qatar Jetisý oblysynyń «Sarqan aýdany ákiminiń aýdandyq mádeniet úii» MKQK naqty ortasha naryqtyq quny 250-300 myń teńge bolatyn bir konditsionerdi 1,5 mln teńgege satyp alýdy josparlaǵan. Agenttiktiń ýaqtyly den qoiýy nátijelesinde atalǵan qarajat qaita qaraldy», - delingen habarlamada.
Sondai-aq, Antikor 14,8 mln teńge somasyna biýdjet qarajatynyń tiimsiz jumsalýyna jol bermegen.
«Máselen, Qostanai oblysynyń aýdandyq bilim bólimi litrine 580 teńgeden 43 myń litr jazǵy dizel otynyn satyp alýdy josparlaǵan, al sol kezdegi ortasha baǵa litrine 250 teńgeden kem bolǵan.
Bul dizel otyny oblys aýdandaryndaǵy mektepter men balabaqshalardyń qajettilikterine arnalǵan.
Sonymen qatar, Sybailas jemqorlyqqa qarsy qyzmet Astana qalasy ákimdiginiń qalalyq aýrýhanasynyń 16 portativti meditsinalyq shamdy birligine 3,3 mln teńgeden satyp alýyn toqtatty. Onyń ortasha naryqtyq quny 600 myń teńgeden aspaidy. Osylaisha, 44 mln teńge somasyna qarajattyń tiimsiz jumsalýyna jol berilmedi», - delingen agenttik usynǵan málimette.
Vedomstvo málimetinshe, ótken jyly biýdjet shyǵystarynyń jalpy somasyndaǵy memlekettik satyp alý úlesi 26%-dy qurady, bul Qazaqstannyń JIÓ qurylymyndaǵy 4,6%-dy qurady. Biýdjet qarajatynyń mundai joǵary ainalymy Memlekettik satyp alý júiesiniń jemqorlyqqa beiimdiligine nazar aýdartady.
«Sybailas jemqorlyqqa qarsy qyzmettiń normativtik-quqyqtyq bazasyn jetildirý maqsatynda memlekettik satyp alý salasyndaǵy zańnamany jetildirý boiynsha sharalar usyndy.
Máselen, «Memlekettik satyp alý týraly» jańa Zańǵa jemqorlyqqa qarsy sharalardy kúsheitý boiynsha birqatar usynys engizildi.
Mysaly, múddeler qaqtyǵysy uǵymyn jáne ony retteýdi engizý, jemqorlyq qylmystary úshin sottalǵan adamdardy josyqsyz jetkizýshiler tizilimine engizý jáne bir kózden satyp alý úshin negizderdi qysqartý usynyldy», - delingen habarlamada.
