Qazaqstanda jekeshelendirý naryqtyq baǵadan 17 ese tómen baǵamen júrgizilýde. Bul týraly Májilis depýtaty Daniia Espaeva málimdedi, dep habarlaidy Ulysmedia.kz.
Halyq qalaýlysynyń aitýynsha, jyl saiyn respýblikalyq biýdjet densaýlyq saqtaý júiesine, onyń ishinde meditsinalyq mekemelerdi jańǵyrtýǵa 1 trln teńgeden astam qarjy quiǵan, alaida bul somalar obektilerdi satý kezinde eskerilmegen.
"Qazaqstandaǵy memlekettik nysandar naryqtyq baǵadan 17 ese tómen baǵamen jekeshelendirildi. Eger memleket salyq tóleýshilerdiń milliardtaǵan qarjysyn jańa densaýlyq saqtaý obektilerin salýǵa jumsap jatsa, qoldanystaǵy emhanalardy tiyn-tebenge taratýdyń qandai máni bar?"– dep narazylyq bildirdi Májilis depýtaty.
Onyń aitýynsha, qazir jekeshelendirýge 700 memlekettik kásiporyn shyǵarylǵan, onyń ishinde meditsinalyq mekemeler men "Qazposhta" da bar.
"Sonda balabaqshalarǵa qatysty oqiǵadaǵydai memleket erteń sol emhanalar men basqa da áleýmettik mańyzy bar nysandardy da úsh ese qymbat baǵaǵa satyp ala ma?" – dedi depýtat.
Aita keteiik, buǵan deiin "Qazatomónerkásip" jekeshelendirý aiasynda óziniń enshiles Kazakhstan Solar Silicon kompaniiasyn 17 ese az satqany týraly aqparat taraǵan.
