Foto: Kz.media
Memlekettik keńesshisi Erlan Qarin Telegram arnasynda jazǵandai, endi memlekettik nagradalar júiesine 9 jańa qurmetti ataq engiziletin boldy.
"Elimizde jumysshy mamandyqtarynyń mártebesi birtindep artyp keledi. Muǵalimder men dárigerlerdiń jalaqysy kezeń-kezeńimen ósip jatyr. Óndiris ozattary men eńbek dinastiialarynyń ókilderine turaqty túrde memlekettik nagradalar beriledi. Kásibi merekeler keńinen atalyp ótiletin boldy", — dep jazdy Erlan Qarin.
Osyǵan orai, Erlan Qarin memlekettik nagradalar júiesine (burynnan bar 6 qurmetti ataqqa) 9 jańa qurmetti ataq engizilgenin aitty.
"Búgin Prezident Qasym-Jomart Toqaev tiisti zańǵa qol qoidy. Endi memlekettik nagradalar júiesine (burynnan bar 6 qurmetti ataqqa) 9 jańa qurmetti ataq engizildi. Atap aitqanda, ǵalymdar men ónertapqyshtarǵa, injenerlerge, sáýletshilerge jáne qurylysshylarǵa, kenshiler men shahterlerge, geologtarǵa, ónerkásip, kólik, aýyl jáne sý sharýashylyǵy salasynyń qyzmetkerlerine beriletin qurmetti ataqtar qosyldy. Qajyrly eńbektiń memlekettik deńgeide baǵalanýy barsha kásip iesine erekshe shabyt beredi jáne eńbek adamynyń bedelin odan ári kóterýge septigin tigizedi. Bul zańǵa Memleket basshysy «Jumysshy mamandyqtar jyly» dep jariialaǵan jańa 2025 jyldyń qarsańynda qol qoiylýynyń simvoldyq máni bar, — dep túiindedi Qarin.
Eske salsaq, Memleket basshysy Qasym-Jomart Toqaevtyń Jarlyǵymen 2025 jyl Jumysshy mamandyqtarynyń jyly dep jariialandy.
