Tanymal aktrisa Dariǵa Badyqova men akter Oljas Abaidyń qudalyq rásiminen taraǵan beinejazbalar áleýmettik jelide qyzý talqyǵa tústi. Ásirese aktrisaǵa berilgen qalyń maldyń mólsheri kópshiliktiń nazaryn aýdardy, dep habarlaidy ult.kz.
Jelide taraǵan aqparatqa sáikes, Oljas Abai Dariǵa Badyqovaǵa arnaiy quda túsip, syrǵa salý rásimin ótkizgen. Qýanyshty sát jaqyn týystardyń qatysýymen shaǵyn otyrys túrinde uiymdastyrylǵan.
Qudalyq barysynda qalyń mal da berilgen. Taraǵan málimet boiynsha, aktrisanyń qalyń malyna 10 myń dollar usynylǵan. Alaida bul soma jeli qoldanýshylary arasynda túrli pikir týǵyzdy.
Keibir oqyrmandar tanymal aktrisa úshin mundai qarajat az ekenin aityp, óz kózqarastaryn bildirgen.
"Arzanǵa ketipti", "10 myń dollar degen az ǵoi, 100 myń dollar berse de laiyqty", "Bastysy eki jas baqytty bolsyn", "Qalyńsyz qyz bolmaidy dep bergenderi ǵoi", – dep jazdy jeli qoldanýshylary.
Degenmen kópshilik arasynda eki óner iesiniń jeke ómirine aralaspai, olardyń qýanyshyna ortaqtasýǵa shaqyrǵandar da boldy.
Al Dariǵa Badyqova áleýmettik jelidegi paraqshasynda kópshilikti ózgeniń jeke ómirine qatysty túrli pikir aitýdan góri, jaqsylyq tileýge shaqyrdy.
"Qudaidyń buiryǵyna eshkim qarsy shyǵa almaidy. Taǵdyrdyń jazǵanyn eshkim ózgerte almaidy.
Qalai desek te, kim ne oilasa da, ár adamnyń óz taǵdyry, óz baqyty bar. Bireýdiń baqytyna tórelik aitý bizge buiyrmaǵan.
Biz eshkimnen eshteńe suramaimyz. Eshkimge eshteńe dáleldeýge de mindetti emespiz.
Tek baqyt tileńizder!
Óitkeni aq nietpen aitylǵan bir aýyz tilek myń túrli pikirden qymbat", – dep jazdy aktrisa.
Osylaisha, Dariǵa Badyqova jeke ómirine qatysty aitylyp jatqan pikirlerge mán bermei, kópshilikten tek aq tilek kútetinin jetkizdi. Ol ár adamnyń óz taǵdyry men baqyty bar ekenin eske salyp, ózgeniń ómirine tórelik aitýdyń qajeti joq ekenin meńzedi.
Dariǵa Badyqova kim?
Dariǵa Bolatqyzy Badyqova – qazaqstandyq teatr jáne kino aktrisasy, kinoprodiýser. Ol 1985 jyly 1 jeltoqsanda Jambyl oblysynyń Moiynqum aýylynda dúniege kelgen. T. Júrgenov atyndaǵy Qazaq ulttyq óner akademiiasynda "Mýzykalyq drama jáne rejissýra" mamandyǵy boiynsha bilim alǵan. Eńbek jolynda rejisser Bolat Atabaevtyń "Aqsarai" mýzykalyq teatrynda aktrisa bolyp qyzmet atqarǵan. Teatr sahnasynda Ǵabit Músirepovtiń "Qyz Jibek" shyǵarmasyndaǵy Qamqa beinesin somdaǵan.
Dariǵa Badyqova 2012 jyly "Ǵashyq júrek" telehikaiasyna túsken. 2013 jyly rejisser Asqar Uzabaevtyń "Abailańyz, siyr!" filminde oinaǵan. Sondai-aq "Traktorshynyń mahabbaty" telehikaiasyna qatysqan. Aktrisa kópshilikke "Kelinjan" telehikaiasyndaǵy Aisara róli arqyly keńinen tanyldy. Bul keiipker onyń shyǵarmashylyq jolyndaǵy mańyzdy rólderiniń birine ainaldy.
2023 jyly Dariǵa Badyqova kinoprodiýser retinde óziniń alǵashqy tolyqmetrajdy týyndysy "Taptym-aý seni" filmin kórermenge usyndy. Romantikalyq komediia janrynda túsirilgen kartinanyń qoiýshy rejisseri Ánýar Matjanov boldy. NTK telearnasynyń málimetinshe, filmniń óndirisine 108 million teńge jumsalǵan. 2024 jyldyń aqpanynda kartinanyń kassalyq tabysy 1 milliard 850 million teńgege jetkeni habarlandy. Keiin aktrisa "Taptym-aý seni 2" filminiń túsiriletinin de málimdedi
Oljas Abai kim?
Oljas Abai (Janabekov) – qazaqstandyq teatr jáne kino akteri, ánshi. Ol 1991 jyly 8 shildede dúniege kelgen. 2011 jyly Temirbek Júrgenov atyndaǵy Qazaq ulttyq óner akademiiasyn drama teatry jáne kino akteri mamandyǵy boiynsha támamdaǵan. Keiin Ǵabit Músirepov atyndaǵy Qazaq memlekettik akademiialyq balalar men jasóspirimder teatrynda qyzmet etken. Óner jolyn teatr sahnasynan bastaǵan akter keiin telehikaialar men kórkem filmderge túse bastady. Onyń alǵashqy ekrandyq jumystarynyń qatarynda "Paryz" jáne "Qara shańyraq" telehikaialary bar. Oljas Abai kórermenge ásirese "Báseke" telehikaiasyndaǵy róli arqyly keńinen tanyldy. Akter serialdyń birinshi jáne ekinshi maýsymyna qatysqan. 2018 jyly "Juldyzdar otbasy" basylymyna bergen suhbatynda "Báseke" telehikaiasynan keiin kinoǵa shaqyrtýlar kóbeigenin aitqan.
Keiin "Áýlet" telehikaiasynda da óner kórsetti. Sonymen qatar "Brat ili brak", "Sisitai", "Klasstastar" jáne "Gýdbai, moi bai 2" filmderine tústi. Akterdiń filmografiiasynda "Bazar joq, Meksika!", "Zero", "Aýylbaiskii ýchastkovyi" jáne "Aiash 3" týyndylary da bar. Ol Dariǵa Badyqovamen birge "Taptym-aý seni" romantikalyq komediiasynda basty rólderdiń birin somdady. Oljas Abai akterlikpen qatar Ochooou sahnalyq atymen ánshilik ónermen de ainalysqan. Búginde ol otandyq kino salasynda shyǵarmashylyq qyzmetin jalǵastyryp keledi.
