QR Memlekettik qyzmet isteri agenttiginiń tóraǵasy Anar Jaiylǵanova Qazaqstanda memlekettik qyzmetshilerdiń sanyn 25 paiyzǵa qysqartý týraly Prezident tapsyrmasy qalai oryndalatynyn aityp berdi, dep habarlaidy QazAqparat.
«Biyl memlekettik apparatty 10 paiyzǵa, kelesi jyly taǵy 15 paiyzǵa ońtailandyrý josparlanyp otyr. Osylaisha Prezidenttiń memlekettik apparatty 25 paiyzǵa qysqartý týraly tapsyrmasy 2021 jyly júzege asyrylady», - dedi Anar Jaiylǵanova OKQ-da ótken baspasóz máslihatynda.
Agenttik tóraǵasynyń aitýynsha, qazirgi ýaqytta Qazaqstanda 97 myń memlekettik qyzmetshi bar. Bul – 9,2 mln ekonomikalyq belsendi halyqtyń 1,1 paiyzy.
«Bul kórsetkish damyǵan memleketterdiń kórsetkishimen sai keledi. Máselen Frantsiiada memlekettik qyzmetshilerdiń úlesi 8 paiyzdy, Kanadada 1,5 paiyzdy, Avstraliiada 1,4 paiyzdy, AQSh-ta 1,3 paiyzdy quraidy. Keiingi jyldary Qazaqstanda memlekettik qyzmetshilerdiń sanyn qysqartý baǵytynda jumys júrgizilip jatyr. 2018 jyly bizde 98,7 myń memlekettik qyzmetshi bolsa, 2019 jyly olardyń sany 97,4 myń, 2020 jyldyń I jartyjyldyǵynda 97 myń boldy», - dedi ol.
Memlekettik organdar halyqtyń ómiriniń búkil salasynyń úzilissiz jumysyn qamtamasyz etetinin eskere otyryp, qysqartý saldarynan kelýi múmkin jaǵymsyz jailardy nazar alyp, birqatar shara qabyldaný kózdelýde.
«Birinshiden ońtailandyrýǵa jatatyn laýazymdar kezinde eń birinshiden turaqty vakantty laýazymdar qarastyrylady. Búgingi tańda vakansiialardyń sany 8 myń. Bul – memlekettik apparattyń jalpy laýazymynyń 8,5 paiyzy. Sonymen birge zeinetkerlerdiń jumysty bosatýyna bailanysty 1 myń laýazym bos qalady. Odan bólek 6 myń memlekettik qyzmetker jeke sektorǵa nemese basqa da uiymdarǵa aýysady. Bul jaǵdailar memlekettik qyzmetshilerdiń shynaiy qysqarýyn azaitar degen senimdemiz», - dedi Anar Jaiylǵanova.
