Qazaqstanda memlekettik qyzmetshilerge jańa Etika kodeksiniń jobasy ázirlendi. Bul týraly QR Memlekettik qyzmet isteri agenttiginiń tóraǵasy Anar Jaiylǵanova aityp berdi, dep habarlaidy QazAqparat.
«Etika talaptaryn qyzmettik etikaǵa jatpaityn ózge de erejelerden bólý maqsatynda memlekettik qyzmetshilerdiń Ádep kodeksin jańa redaktsiiada jazý usynylyp otyr. Osyǵan bailanysty, qazirgi ýaqytta ózge elderdiń tájiribesin eskere otyryp, «Halyq únine qulaq asatyn memleket» tujyrymdamasynda, Prezidenttiń strategiialyq qujattary men bastamalarynda aiqyndalǵan zamanaýi talaptarǵa sáikes keletin memlekettik qyzmetshilerdiń jańa Ádep kodeksiniń jobasy ázirlendi», - dedi Jaiylǵanova QR Memlekettik qyzmet isteri agenttiginiń alqa otyrysynda.
Spikerdiń aitýynsha, kodekste qyzmettik etikanyń belgili bir standarttarynan bólek, memlekettik qyzmetshilerdiń etika buzýynyń aldyn alý sharalary praktikalyq usynystar túrinde qarastyrylǵan.
«Jańa kodeks memlekettik qyzmetshilerdiń etikalyq mádenietin qalyptastyrý jumysyn jańa deńgeige kóteredi dep oilaimyz. Memlekettik basqarý akademiiasy bazasynda etika men quqyqtyń ózekti máselelerin oqytý, múddeler qaqtyǵysyn sheshý boiynsha memlekettik qyzmetshilerdiń biliktiligin arttyrýdyń jańa kýrsyn ázirleý jumystary júrip jatyr», - dep tolyqtyrdy Anar Jaiylǵanova.
