QR Sybailas jemqorlyqqa qarsy is-qimyl agenttigi tóraǵasynyń orynbasary Oljas Bektenov memlekettik qyzmetshilerdiń, Parlament depýtattary men sýdialarǵa sheteldik bankterde shot ashýǵa tyiym salýǵa qatysty zańdaǵy jańa novellanyń mán-jaiyn túsindirdi, dep habarlaidy QazAqparat.
«Memlekettik qyzmet – birqatar shekteýlerdi qabyldaýdy kózdeitin qyzmettiń erekshe túri. Osy túzetýlerdi ázirleý kezinde el men halyqtyń múddesi úshin qyzmet etý ideologiiasy basshylyqqa alyndy. Endi memlekettik qyzmetshilerdi qyzmetke taǵaiyndaý kezinde sheteldegi shottaryn jabý úshin alty ailyq merzim beriledi. Jumys istep júrgen memlekettik qyzmetshilerge qatysty sóz qozǵasaq, olarǵa zań qoldanysqa engizilgen kúnnen bastap Qazaqstan Respýblikasynan tys aýmaqta ornalasqan sheteldik banktik shottardy jabýǵa alty ai beriledi», - dedi Oljas Bektenov OKQ-da ótken baspasóz máslihatynda.
Onyń aitýynsha, bul rette memlekettik qyzmetshilerdiń sheteldik bankterde shottarynyń bolýyna quqyǵy bar jaǵdailar aiqyndalǵan.
«Olardyń qatarynda: shetelde jumys isteý, oqý, taǵylymdamadan ótý, issapar nemese emdelýden ótý, kámeletke tolmaǵan balanyń zańdy ókili retinde shetelde bolý jaǵdailary bar. Eger memlekettik qyzmetshi sheteldik banktegi shotty japqysy kelmese, memlekettik qyzmetten ketýge niet bildirse, onda ol óz erkimen jumystan shyǵý týraly ótinish bere alady», - dedi ol.
