QR Memlekettik qyzmet isteri agenttigi árbir azamattyń memlekettik qyzmetti jetildirýge jáne qoljetimdi tsifrlyq memleketti qurýǵa úles qosýyna múmkindik beretin «Tyńdaý» biregei jobasyn iske qosty. Bul týraly atalǵan agenttiktiń tóraiymy Anar Jaiylǵanova Facebook paraqshasynda jazdy, dep habarlaidy "Ult aqparat".
«Memleket basshysy óziniń «Syndarly qoǵamdyq dialog – Qazaqstannyń turaqtylyǵy men órkendeýiniń negizi» atty halyqqa Joldaýynda «Halyq únine qulaq asatyn memleket» tujyrymdamasy barlyq azamattardyń ótinishine jedel jáne tiimdi áreket etýge baǵyttalýy tiis ekenin atap ótti. Bul rette Prezident memlekettik apparat qyzmetindegi problemalar kóbinese azamattar men jergilikti jerlerdegi memlekettik qyzmetkerler arasyndaǵy keri bailanystyń bolmaýyna bailanysty ekendigine nazar aýdardy. «Halyq únine qulaq asatyn memleket» – bul barynsha ashyq jáne esepti memleketti qalyptastyrý. Sondyqtan memlekettik apparat ár sala boiynsha birinshi kezekte halyqtyń pikirin barynsha eskerýi tiis», - deidi agenttik tóraiymy.
Onyń atap ótýinshe, «Tyńdaý» jobasy erikti qoldanýshylar pikiri aiasynda qurylǵan. Jobaǵa qatysý úshin elektrondy qyzmetti alý talap etiledi jáne barlyǵyn tyndau.kz siltemesi boiynsha onlain-saýalnamada belgilei otyryp, onyń árbir qadamyn baǵalaý qajet.
«Budan bólek, agenttik tek memlekettik qyzmetterge shaǵym jinamaidy. Bizdiń negizgi maqsatymyz – problemaly jerlerdi anyqtap, tiimdi keri bailanys ornatý. Jinaqtalǵan máseleler bazasyna taldaý jasap, memlekettik organdarǵa qajetsiz qadamdardy joiý, halyqtyń memlekettik qyzmetterdi alý protsesterin jeńildetý boiynsha naqty usynystar beretin bolamyz. Ótken aptada biz «Tyńdaý» jobasyn iske qostyq jáne probatsiialaý maqsatynda eki qyzmetti tańdap aldyq. Olar - tólqujat pen jeke kýálikti alý qyzmeti. Qazirgi ýaqytta osy baǵyt boiynsha azamattardan usynys jinaý jalǵasýda. Búgin osy joba aiasynda eriktilerdiń ishinen alǵashqy fokýs-top quryldy jáne usynystar jinalyp jatyr», - dedi ol.
Agenttik basshysynyń aitýynsha, «elektrondyq úkimet» portalynda jumys protsesterin jaqsartý úshin avtomatty túrde terý jáne tek JSN-di tergen kezde azamattyń derekterin (aty-jóni, týǵan jyly men jeri) tartýǵa qol jetkizetin jasandy intellekt negizinde arnaiy qosymshalar, júkteletin skanerlengen qujattar men fotosýretterdi (3h4) júiege qajetti formattarǵa avtomatty túrde keltirý úshin túrlendirýge arnalǵan kómekshi qosymshalar boiynsha usynystar ázirlendi.
Sondai-aq avtomattandyrylǵan qyzmetterdiń jumysqa qabiletin testileý, ETsQ nemese bir ret qoldanylatyn parol kómegimen avtorizatsiialaý nemese qol qoiý kezinde týyndaityn aqaýlar anyqtalady.
«Aldaǵy ýaqytta elektrondyq qyzmetter boiynsha tiisti materialdardyń jinalýyna qarai azamattardyń usynystary múddeli organdarmen birlesip, kórsetiletin qyzmetti alýshylardy habardar ete otyryp, pysyqtalatyn bolady. Biz jaqyn ýaqytta «Tyńdaý» halyqtyń pikirin eskeretin tiimdi joba bolady dep úmittenemiz», - dedi Anar Jaiylǵanova.
