Foto: QR EM
Jambyl oblysynda jylyna 25 myń tonna natrii tsianidin óndirýge arnalǵan jańa himiia zaýytynyń qurylysy bastaldy. Bul óndiristik keshen eldegi himiia jáne qaita óńdeý ónerkásibin damytýdaǵy mańyzdy jobalardyń birine ainalmaq. Kásiporyndy iske qosý 2027 jyldyń naýryzyna josparlanǵan, dep habarlaidy Ult.kz.
«Himpark Taraz» arnaiy ekonomikalyq aimaǵynda salynyp jatqan zaýyt ishki naryqtaǵy suranysty tolyq qamtamasyz etip qana qoimai, eksporttyq áleýetti de arttyrady. Kásiporyn ónimin otandyq tutynýshylardan bólek, Ózbekstan, Qyrǵyzstan, Tájikstan jáne Mońǵoliiaǵa jetkizý kózdelip otyr.
Jobany júzege asyrý elimizdiń himiia salasyn aitarlyqtai nyǵaityp, ammiak pen kaýstikalyq soda boiynsha ishki naryqty shamamen 50 paiyzǵa keńeitýge múmkindik beredi. Sonymen qatar, bul bastama ilespe salalardyń damýyna da serpin berip, jergilikti qamtýdyń artýyna yqpal etedi.
Kásiporyn iske qosylǵan soń 108 turaqty jumys orny ashylady, al qurylys kezeńinde 200-ge jýyq adam ýaqytsha jumyspen qamtylady. Jobanyń ekonomikalyq áseri de aiqyn: jyl saiyn respýblikalyq biýdjetke shamamen 500 mln teńge kóleminde salyq túsedi dep kútilýde.
Investitsiialyq jobany «Altynalmas Reagents» JShS júzege asyryp jatyr. Onyń nátijesinde Qazaqstan men Ortalyq Aziiadaǵy taý-ken óndirý ónerkásibine qajetti shikizatty ishki naryqtan turaqty túrde qamtamasyz etetin óndiristik tizbek qalyptaspaq. Aita keteiik, osy salada natrii tsianidine degen suranys jyl saiyn ósip keledi.
Qurylysty qarjylandyrýdy «Qazaqstannyń Damý Banki» AQ, «Báiterek» holdinginiń enshiles uiymy qamtamasyz etip otyr. Bank pen jobany iske asyrýshy kompaniia arasynda nesielik jeli týraly kelisimge 2023 jyldyń qyrkúiek aiynda qol qoiylǵan. Al 2024 jyldyń mamyrynda alǵashqy qarjylandyrý ashyldy. Bólingen qarajat kólemi – 98,8 mln eýro, bul jobanyń jalpy qunynyń 75 paiyzyna teń. Qarajat jobalaýdan bastap qurylys-montaj jáne iske qosý-retteý jumystaryna deiingi barlyq negizgi kezeńderdi qamtidy.
