Memlekettik qoldaý kórsetiletin iri kompaniialardyń tizimi jasalyp jatyr. Bul týraly QR Prezidenti Qasym-Jomart Toqaevtyń málimdemesinde aitylǵan, dep habarlaidy "Ult aqparat".
«Búginde shaǵyn jáne orta biznes kúrdeli jaǵdaiǵa tap boldy. Osy salaǵa qazir kómektespesek, ekonomikany qalpyna keltire almaimyz. 700 myńnan astam kompaniia men jeke kásipkerge salyqtyq jeńildikter jasaldy. Sol arqyly olar 1 trillion teńgege jýyq qarjyny únemdei alady. Shaǵyn jáne orta bizneske tiimdi nesie berý úshin qarajat bólindi», - dedi QR Prezidenti.
Memleket basshysynyń atap ótýinshe, jumysshy sanyn jáne eńbekaqy kólemin azaitpaý maqsatynda iri kompaniialarǵa tiisti qoldaý kórsetiledi.
«Qazir olardyń tizimi jasalýda. Oǵan el ekonomikasy úshin asa mańyzdy kompaniialar ǵana engiziledi»,- dedi Qasym-Jomart Toqaev.
