QR Memlekettik hatshysy Erlan Qarin Ahmet Baitursynulynyń 150 jyldyǵyna arnalǵan halyqaralyq ǵylymi-praktikalyq konferentsiiada Alash dáýiri men búgingi táýelsiz Qazaqstan kezeńine ortaq ulttyq múddeniń ne ekenin aitty, dep habarlaidy QazAqparat.
«El búginshil, meniki erteń úshin» demeitin be edi Ahańnyń ózi? Sol Ahań dál jetkizip aitqan erteńde ómir súrip jatqan jáne ony bolashaqqa jalǵaityn urpaqpyz. Halqymyz aldyńǵy býynnyń azattyq jolyndaǵy kúresinen tálim ala bilýge tiis.
Ótken ǵasyrdyń basy elimizdiń azattyq jolyndaǵy kúres kezeńi ǵana emes, aýqymdy aǵartýshylyq dáýiri retinde tarihqa endi. Bastaýynda Shoqan, Ybyrai, Abai turǵan aǵartýshylyq ideialar Ahańdardyń tusynda jańasha óristedi. Sóitip bul kezeń qazaqtyń jańǵyrý kezeńi boldy», - dedi Erlan Qarin.
Onyń aitýynsha, ulttyq jańǵyrý kezeńi jasampaz tulǵalardy týdyrady.
«Dúniejúziniń tarihyna zer salsaq, halyqtar men memleketter reformator tulǵalardyń arqasynda damýdyń jańa belesterine kóterilgen. Ahań qazaq úshin osyndai tulǵa. Ahmet Baitursynuly ómir súrgen dáýir men qazirgi táýelsizdik zamanyn bailanystyratyn ortaq múdde – ulttyq bolmysty saqtai otyryp, órkenietti el bolý. Ult ustazy qai zamanda da halqymyzdyń úly kósemi bolyp qala beredi», - dedi Memlekettik hatshy.
