QR Premer-Ministri Álihan Smaiylovtyń tóraǵalyǵymen ótken Úkimet otyrysynda kásipkerlik qyzmetti retteýdiń jańa tásilderin iske asyrý máseleleri qaraldy.
Ulttyq ekonomika ministri Álibek Qýantyrov, «Atameken» UKP basqarma tóraǵasynyń mindetin atqarýshy Nariman Ábilshaiyqov baiandama jasady, dep habarlaidy primeminister.kz saity.
2021 jylǵy 30 jeltoqsanda Memleket basshysy QR-da kásipkerlik qyzmet salasynda jańa retteý saiasatyn engizý máseleleri jónindegi zańǵa qol qoidy. Zańnyń qoldanylýyn qamtamasyz etý úshin qabyldanýy qajet quqyqtyq aktilerdiń tizbesi 164 NQA-ny qamtidy.
Memlekettik baqylaýdyń jańa formalary tekseristerden profilaktikalyq is-sharalarǵa kóshýdi qamtityn bolady. Zań aiasynda tekserister men profilaktikalyq baqylaý júrgizý kestelerin daiyndaýǵa adamnyń barynsha az qatysýyn qamtamasyz etetin, táýekelderdi basqarý júiesin avtomattandyrý jónindegi normalar zańnamalyq túrde bekitildi.
Úkimetke memlekettik organdardyń bizneske qoiatyn talaptaryn qysqartý maqsatynda tásilderdi sapaly iske asyrýdy qamtamasyz etý tapsyryldy. Qazirgi kezde mundai talaptardyń 40%-y jańa tásilderge sáikes kelmeidi.
Reformany jańadan iske asyrý biznes-ortany retteý tiimdiligin arttyrýǵa jáne kásipkerlikti jandandyrý úshin qolaily ári yntalandyrýshy jaǵdailar jasaýǵa múmkindik beredi. Biznes shamadan tys ákimshilik júktemeniń azaiǵanyn sezine bastaýy tiis. Ol úshin Mindetti talaptar reestrin qurýdy jáne sapaly qalyptastyrýdy qamtamasyz etý qajet.
QR Premer-Ministri Ulttyq ekonomika ministrligine «Atameken» palatasymen birlesip, retteýdiń jańa tásilderine sáikes Mindetti talaptar reestrin qurýdyń kestesin bekitýdi tapsyrdy.
«Qarjy ministrligi Ádilet ministrligimen birlesip, biýdjetti naqtylaý aiasynda “Ádilet” aqparattyq júiesiniń bazasynda Reestrdi qurýǵa qarajat qarastyrsyn», — dedi Smaiylov.
Sondai-aq QR Premer-Ministri qabyldanǵan zańǵa sáikes, buǵan deiingi retteýshilik aktilerge olardyń jańa bazalyq tásilderge sáikestigi turǵysynan tekserý jáne baǵalaý jumystaryn júrgizý qajet ekenin atap ótti. Barlyq múddeli memlekettik organdarǵa biylǵy 1 shildege deiin atalǵan aktilerdi qaita qaraý tapsyryldy.
«Memlekettik baqylaý jáne biznestiń esep berý júiesin avtomattandyrý qajet. Sondyqtan Tsifrlyq damý, innovatsiialar jáne aeroǵarysh ónerkásibi jáne Ulttyq ekonomika ministrlikterine Bas prokýratýranyń Quqyqtyq statistika komitetimen birge osy júieni avtomattandyrý boiynsha tiisti sharalar qabyldaýdy tapsyramyn», — dep qorytyndylady QR Premer-Ministri.
