Qazaqstan Respýblikasynyń Memlekettik akademiialyq bi teatry endi onyń negizin qalaýshy, kórnekti horeograf Bolat Aiýhanovtyń esimimen atalady. Atalǵan sheshim Memleket basshysy Qasym-Jomart Toqaevtyń tapsyrmasyna sáikes qabyldandy, dep habarlaidy ult.kz.
Bolat Aiýhanov – Qazaqstandaǵy kameralyq balet óneriniń negizin qalaǵan biregei tulǵa. Ol 1967 jyly «Almatynyń jas baletin» qurdy. Keiin bul óner ujymy el ishinde ǵana emes, shetelde de keńinen tanylyp, Keńes Odaǵy respýblikalarynda, Eýropa men Skandinaviia elderinde óner kórsetti.
Teatr ujymy ondaǵan jyl boiy horeograf qalyptastyrǵan shyǵarmashylyq mekteptiń dástúrin jalǵastyryp keledi.
«Búginde Bolat Aiýhanovtyń qoiylymdary ulttyq horeografiia óneriniń altyn qoryna endi. Ustazdyq jolynda talai daryndy ártisti tárbielegen ol tutas bir býynnyń kásibi qalyptasýyna eńbek sińirdi.
Teatrdyń 60-maýsymynyń ashylý qarsańynda Bolat Aiýhanovtyń esiminiń berilýi erekshe mánge ie. Bul – kórnekti horeograftyń qazaq balet ónerine sińirgen eńbegine berilgen joǵary baǵa», - delingen ministrlik habarlamasynda.
2027 jyly teatrdyń qurylǵanyna 60 jyl tolady. Mereitoi qarsańynda teatr ujymy óner iesiniń mol shyǵarmashylyq murasyn jalǵastyryp, ulttyq balet mektebiniń ozyq dástúrlerin saqtap keledi. Ujym klassikalyq, ulttyq, neoklassikalyq jáne zamanaýi horeografiia baǵyttaryn da júieli túrde damytyp otyr.
