Qazaqstannyń Tuńǵysh Prezidenti – Elbasy, Qaýipsizdik Keńesiniń tóraǵasy Nursultan Nazarbaev eldiń áleýmettik-ekonomikalyq damýyn qamtamasyz etý úshin biregei amal-ádis kerektigin málim etti, dep habarlaidy QazAqparat.
«Eń birinshi kezekte daǵdarysqa qarsy sharalar keshenin júzege asyrý kerek. Qoldaýdyń bári biznes pen halyqqa jetýi úshin árbir teńgeni qadalaǵaý kerek. Qazirdiń ózinde ekonomikany qalpyna keltirý men daǵdarystan keiingi damý baǵdarlamasyn bastai bergen abzal. Negizgi salalar, bolashaq ekonomikasy, qalalar men aýyldardy, áleýmettik sala men qarjy júiesi boiynsha baǵyttardy aiqyndaý kerek», - dedi Elbasy Qaýipsizdik Keńesiniń otyrysynda.
Elbasy daǵdarysqa qarsy sharalardy júzege asyrý úshin memlekettik basqarýdyń barlyq deńgeiinde tiimdi jumysty jolǵa qoiý kerektigin eske saldy.
«Qazaqstanǵa – biryńǵai ortalyqpen ári strategiialyq jáne operatsiialyq naqty jospar boiynsha basqarylatyn tiimdi korporatsiia turǵysynan qaraityn ýaqyt jetti. Memlekettik basqarýshylardyń bári – aýyl ákiminen bastap Úkimet múshesine deiin óz jumysyn qaita qarap, naqty nátijege jetýi tiis. Memleketke ekonomikany qalypqa keltirip, jumyssyzdyqty azaityp, halyqty qajetti azyq-túlikpen qamtamasyz etý úshin tiisti sharalardy qabyldaýǵa ázir batyl menedjerler kerek», - dedi Nursultan Nazarbaev.
Sóz sońynda Qaýipsizdik Keńesiniń tóraǵasy eldiń damýyn ýaqtyly kóre bilý – 2020 jylǵy daǵdarystan aman ótip qana qoimai, búkil memleketti paidaǵa kenelter basymdyq beretinin jetkizdi.
«Biz bul daǵdarysty eńseretinimizge senimdimin. Ákimder, ministrlerdiń bári de jaýapty. Úkimet memlekettik baǵdarlamalar men daǵdarysqa qarsy sharalardyń tiimdi júzege asyrylýyn qamtamasyz etýi tiis. Búkil halyqqa aitarym: osynaý sharalar legin qoldap, birlik tanytyp, yntymaq pen tártip saqtaý kerek. Jumystyń bári de halyqtyń qamy úshin jasalyp jatyr», - dedi Nursultan Nazarbaev.
