Qazaqstandyqtar jalǵa alatyn baspana qunynyń teń jartysy memleketten óteletin bolady. Bul týrly QR Indýstriia jáne infraqurylymdyq damý ministrliginen málim etti, dep habarlaidy QazAqparat.
Ministrlik turǵyn úidi jalǵa alǵany úshin tólem berý tetigin ázirledi. Ataýly turǵyn úi kómegi jalǵa alý qunynyń «50% memleket, qalǵan 50% jalǵa alýshy tóleidi» qaǵidatyna negizdeledi.
Mundai tólemder jergilikti atqarýshy organdarda kezekte turǵan azamattarǵa beriledi jáne olardyń tabysy eń tómengi kúnkóris deńgeiiniń 1 eselengen kóleminen aspaýy kerek.
«Búgingi tańda elimizde mundai 70 myń jan bar. Olar: kópbalaly otbasylar, 1 jáne 2-toptaǵy múgedekter, múgedek balalar jáne ata-anasynyń qamqorlyǵynsyz qalǵan balalar. Osy sanattaǵy azamattarǵa jalǵa beriletin turǵyn úi qunynyń jartysyn taǵaiyndaý kózdeledi. Operator retinde «Otbasy bankin» anyqtaý usynyldy», - delingen ministrlik aqparatynda.
Ótinish berýshiler úshin mynandai negizgi talaptar qoiylady:
1) Qazaqstan Respýblikasynyń azamaty bolýy;
2) otbasynyń (azamattyń) árbir múshesine shaqqandaǵy sońǵy 6 (alty) aidaǵy jiyntyq tabysy tiisti qarjy jylyna arnalǵan respýblikalyq biýdjet týraly Zańmen bekitilgen eń tómen kúnkóris deńgeiiniń 1 eselengen shamasynan aspaýy;
3) «Turǵyn úi qatynastary týraly» Zańǵa sáikes baspanaǵa muqtaj retinde esepke qoiylyp, turǵyn úige muqtaj mártebesin alýy;
4) turǵyn úidiń menshik iesi men jalǵa alýshy arasynda jasalǵan, sondai-aq quqyqtyq kadastrda tirkelgen sharttyń bolýy.
