"Aqtóbe oblysynyń ákimi Berdibek Saparbaev 2016 jylǵy áleýmettik-ekonomikalyq damýynyń aldyn-ala qorytyndysyn shyǵardy", - dep habarlaidy "Ult aqparat" oblystyq ákimdiktiń baspasóz qyzmetine silteme jasap.
2016 jyly Aqtóbe oblysy alǵa baǵyttalǵan damý qarqynyn odan ári jalǵastyrdy. El basshylyǵynyń, QR Úkimetiniń qoldaýymen, jergilikti atqarýshy organdar Memleket basshysynyń negizgi áleýmettik-ekonomikalyq kórsetkishterdiń tómendeýin boldyrmaý boiynsha berilgen tapsyrmasyn júzege asyrdy.
Sońǵy statistikalyq málimetterge sáikes, ónerkásip óndirisi kólemi, negizgi kapitalǵa investitsiialar tartý, belsendi shaǵyn jáne orta biznes sýbektileriniń sany, aýylsharýashylyǵynyń jalpy ónimi, oblystaǵy memlekettik kiris biýdjetiniń t.b. jyldyq jospary 100 paiyzdan asa júzege asyrylǵan. Sondai-aq, qurylys jumystary jáne bólshek taýar ainalymy kólemderi de jyl qorytyndysy boiynsha tolyq oryndalady dep kútilýde.
Jekelegen aýdandardyń keibir áleýmettik-ekonomikalyq kórsetkish josparyn júz paiyz oryndamaǵanyna qaramastan, oblysta oń nátijelerge qol jetkizildi. Belgilengen boljamdyq kórsetkishterdiń igerilmeý sebepteri qańtar aiynyń ekinshi onkúndigine ótetin keńeitilgen otyrysta egjei-tegjeili talqylanatyn bolady.
Keńes barysynda sondai-aq, biýdjettiń shyǵys bóligi 99,5 paiyzǵa oryndalǵany aityldy. Berdibek Saparbaev biýdjettik baǵdarlamalardy iske asyratyn basqarma basshylaryna qarjyny igermegeni úshin olardyń jeke jaýapkershilikteri qaralatynyn eske saldy. Ásirese 320 million teńgege jýyq qarjyny igermegen oblystyq dene shynyqtyrý jáne sport basqarmasynyń jumysy qatań synǵa alyndy.
"Sport mektepterin jaraqtandyrý, sport infraqurylymyn jaqsartý úshin tiisti ministrlikter, vedomstvolarmen qarjy bólý jóninde jyl boiy jumys júrgizildi. Al nátijesi osy! Bul jaýapkershiliktiń joqtyǵyn kórsetedi. Ásirese áleýmettik-mádeni sala nysandaryna "Jumyspen qamtý jol kartasy" baǵdarlamasy boiynsha bólingen qarajattyń igerilmegeni qynjyltady. Bizdiń mektepterdiń, bala baqshalardyń, joldardyń jai-kúiin jaqsy bilemin. Memleket bizge jaǵdaidy durystaý úshin, jaqsartý úshin qarjy bóledi, al biz ony igere almaimyz. Jaýapkershilikten qashamyn dep oilamańyzdar, olai bolmaidy", - dedi óńir basshysy memlekettik baǵdarlama ákimshileriniń basshylaryna.
Jiyndy qorytyndylaǵan oblys ákimi birqatar tapsyrmalar belgiledi.
"Biz jyldy qalai bastasaq, solai qorytyndylaimyz. Ótken jyly atqarylǵan qarqyndy jumys 2017 jyly da jalǵasatyn bolady. Osy jylǵy biýdjet byltyrǵymen salystyrǵanda 15 paiyzǵa artty. Bólingen qarajatty ýaqytynda igerý úshin konkýrstyq protsedýrany der kezinde ótkizý mańyzdy. Biz halyq igiligi úshin birlese otyryp budan da artyq jumys jasaýymyz kerek. Búgingi kúni biz ótken jyly qandai kemshilikterge jol bergenimizdi saralap, qandai máselelerge erekshe nazar aýdarýymyz qajettigine kóńil bólip, jumystyń biryńǵai baǵyttaryn aiqyndaýymyz qajet. Bizdiń mindetimiz - Memleket basshysynyń halyqtyń ál-aýqatyn jaqsartýǵa baǵyttalǵan tapsyrmalaryn oryndaý maqsatynda kemshilikterimizdi joiyp, óńirdi odan ári damytý úshin barlyq rezervterdi paidalaný, - dep jiyndy qorytyndylady Aqtóbe oblysynyń ákimi.
.jpeg)