Foto: Aqordanyń baspasóz qyzmeti
Birqatar aimaq infraqurylymdy jáne búlingen úilerdi qalpyna keltirýge kiristi. Bul týraly Memleket basshysy Qasym-Jomart Toqaev «Birlik. Jasampazdyq. Órleý» taqyrybymen ótip jatqan Qazaqstan halqy Assambleiasynyń kezekti HHHIII sessiiasynda aitty.
«Kezinde bir ǵana bógenniń buzylýy úlken qaiǵyly oqiǵaǵa ákep soqtyrǵanyn bilesizder. Men jaǵdaidy baqylaýda ustaý úshin birqatar aimaqta boldym. Turǵyndarmen arnaiy kezdestim. Ortalyq jáne jergilikti memlekettik organdar apat saldaryn joiýǵa bar kúshin jumsap jatyr. Jaǵdaidyń odan ári ýshyǵyp ketpeýi – basty nazarda. Qutqarýshylar kúndiz-túni jumys istep júr. Ulttyq ulan, Ishki ister ministrligi, Qarýly Kúshter, Ulttyq qaýipsizdik komiteti, Memlekettik kúzet qyzmetiniń jeke quramy da belsene atsalysyp jatyr», - dedi Prezident.
Memleket basshysy óziniń tapsyrmasymen memlekettik materialdyq rezervti paidalanýǵa ruqsat berilgenin atap ótti. Respýblikalyq jáne oblystyq jedel shtabtar jumys istep jatqanyn, qoǵam belsendileri jáne volonterler gýmanitarlyq kómek jinaýdy qolǵa alǵanyn atap ótti.
«Halqymyzdyń yntymaǵy men joǵary azamattyq jaýapkershiligi osy kezde aiqyn kórindi. Birqatar aimaqtar infraqurylymdy jáne búlingen úilerdi qalpyna keltirýge kirisip ketti. Bul sharýaǵa iri biznes ókilderi qosyldy. Qoǵam belsendileri de zor úles qosýda. Elimizdegi kompaniialar, jeke kásipkerler túrli kómek qorlaryna qomaqty qarjy aýdardy. Qarajat kún saiyn túsip jatyr, kómek qory ulǵaiady dep senemin. Kásipkerlerge zor alǵys aitamyn. Bolashaqta da halqymyzdyń igiligi úshin birge jumys isteimiz dep senemin», - dedi Qasym-Jomart Toqaev.
Prezident jinalǵan qarajat eldi mekenderdi qalpyna keltirýge jumsalatyndyǵyn aitty.
«Sondai-aq apattyń kesirinen qiyn jaǵdaiǵa tap bolǵan azamattarǵa kómek retinde beriledi. Eshkim eleýsiz qalmaidy. Memleket shyǵyndy túgel óteidi. Tasqynnyń zardabyn joiý úshin biýdjet shyǵystary qysqartylatyn boldy. Memleket qarjysyn qatań únemdeý rejimi engiziledi. Árine, mańdai termen tirnektep tapqan dúnie-múlikti bir sátte joǵaltý ońai emes. Men muny túsinemin. Zardap shekken azamattarǵa taǵy da aitamyn: búkil halyq – sizdermen birge. Kóp uzamai barshańyz qalypty ómirge qaita oralasyzdar. Ol úshin memleket bárin jasaidy», - dedi Memleket basshysy.
