Muqtaj azamattardyń barlyǵyna memleket kómektesedi. Bul týraly «Habar 24» telearnasynyń tikelei efirinen QR Aqparat jáne qoǵamdyq damý ministri Dáýren Abaev aitty, dep habarlaidy QazAqparat.
«Búgin biz respýblikalyq kommýnikatsiialar ortalyǵynan brifing berip otyrmyz. Bul shtab tótenshe jaǵdai kezine arnalyp, Prezidenttiń tikelei tapsyrmasymen ashylǵan bolatyn. Ortalyqtyń jumysy úsh baǵyt boiynsha júrgiziledi. Birinshi - jalǵan aqparattardy taýyp, teriske shyǵarý. Ekinshi - ortalyq memlekettik organdardyń aqparattyq jumysyn úilestirý, bolǵan jaǵdailarda birlesip, jedel áreket etý. Úshinshi - Coronavirus2020.kz saitynyń jumysyn júrgizý», - dedi ministr.
Dáýren Abaevtyń atap ótýinshe, keshe Memleket basshysy daǵdarysqa qarsy óte aýqymdy sharalar týraly baiandady.
«Ózderińiz estigendei muqtaj azamattardyń barlyǵyna memleket kómektesedi. Eshkim qamqorlyqsyz qalmaidy. Prezident sóziniń basty túiini osy. Qazir jýrnalister men azamattardan kelip túsip jatqan suraqtardyń basym kópshiligi Prezident Qasym-Jomart Toqaevtyń tapsyrmalarynyń iske asyrylýyna qatysty. Osy rette búgin Premer-Ministrdiń tóraǵalyǵymen Úkimettiń otyrysy ótti. Barlyq ministrler men ákimder keshe Prezident bergen tapsyrmalardy oryndaý boiynsha jol kartalaryn jasaidy. Osyǵan orai barshańyzdan túsinistik tanytyp, Úkimettiń naqty tetikteriniń jariialanýyn kútýdi suraimyz», - dedi ol.
Ministr Prezident tapsyrmalarynyń barlyq pýnkteri oryndalatyndyǵyn basa aitty.
«Mysaly qazirdiń ózinde keibir adamdar tabysynan aiyrylǵan azamattarǵa tólemderdi qalai alýǵa bolady, oǵan qandai qujattar kerek ekenin surap jatyr. Qazir bul tetikter uiymdastyrylýda. Nátijesi jaqyn ýaqytta belgili bolady. Tólemder kimge tiesili bolsa, sol azamattardyń barlyǵy alady. Alý tártibin qosymsha habarlaimyz», - dedi Dáýren Abaev.
