Osy sessiiada depýtattar jumys isteitin zań jobalarynyń erekshe mańyzy bar. Bul týraly Májilis tóraǵasy Erlan Qoshanov aitty, dep habarlaidy QazAqparat.
«Búgin barlyǵymyz Prezidenttiń kezekti Joldaýyn tyńdadyq. Bul Joldaý asa erekshe boldy dep aitar edim. Ol buryn bastalǵan reformalardyń logikalyq jalǵasy bolyp otyr. Óte mańyzdy, elimizdiń bolashaq damýyna, taǵdyryna qatysty aýqymdy máseleler kóterildi. Eń bastysy, Memleket basshysy Joldaýda alǵash ret bolashaq sailaý naýqandarynyń kestesin jariialap, elimizdiń búkil saiasi júiesiniń jańaryp-jańǵyrýyna jol ashyp berdi. Bul biliktiń ashyqtyǵyn jáne memleket pen qoǵam arasyndaǵy senimniń nyǵaiýyn aiqyn kórsetedi. Sonymen birge, Prezident eń ózekti máselelerge toqtalyp, olardy sheshý joldaryn usyndy», - dedi Qoshanov Májilistiń jalpy otyrysynda.
Osy oraida ol Prezident Joldaýda aitqan barlyq máseleler qoǵam suranysyna sai keletinin aitty.
«Qazir qazaqstandyqtardy tolǵandyratyn eń basty másele – ekonomikanyń damýy, halyqtyń ál-aýqatyn arttyrý. Eldi baǵa men tarifterdiń ósýi alańdatyp otyr. Prezident Joldaýda kóptiń kókeiinde júrgen osy suraqtarǵa naqty jaýap berdi. Ol «Azamat – biznes – memleket» arasyndaǵy qatynasty túbegeili ózgertýdi usyndy. Onyń basty maqsaty – biznes ashyp, kásipkerlikpen ainalysý úshin teń múmkindikter jasaý, ekonomikalyq erkindikti qoldaý, memlekettiń ekonomikaǵa shekten tys aralasýynan bas tartý. Sonymen birge, salyq jáne biýdjet júiesin jańǵyrtýǵa, biýdjet qarajatynyń tiimdiligin arttyrýǵa, memlekettik-jekemenshik áriptestik pen memlekettik satyp alý mehanizmderin jetildirýge, otandyq biznes úshin nesie resýrstarynyń tapshylyǵy máselesin sheshýge erekshe basymdyq berilip otyr. Qazirgi álemdegi kúrdeli ahýalǵa qaramastan, memleket halyq aldyndaǵy áleýmettik mindettemelerin tolyq oryndaidy jáne arttyrady», - dedi Májilis tóraǵasy.
Onyń aitýynsha, Májilis depýtattary aldynda konstitýtsiialyq reformalar aiasynda da birqatar zańdy qabyldaý mindeti tur.
«Osy sessiiada depýtattar jumys isteitin zań jobalarynyń erekshe mańyzy bar jáne ony qoǵam da kútip otyr. Sondyqtan, olardy qaraý kezinde halyqtyń, azamattyq qoǵam ókilderi men sarapshylardyń pikiri meilinshe eskerilýi tiis.
Jumys toptarynyń otyrystary, zań jobalardyń tanystyrylymy siiaqty barlyq jiyndarǵa jurtshylyqtyń keńinen qatysýyn qamtamasyz etý qajet», - dedi Qoshanov.
