Qazaqstan Respýblikasynyń Prezidenti Nursultan Nazarbaev otandyq BAQ ókilderimen kezdesýde Qazaqstandyqtarǵa páterge qol jetkizýge kómektesetin baǵdarlamalar týraly aityp berdi. Munymen qatar, Elbasy memlekettiń basty maqsaty – halyqty úimen emes, jumyspen qamtamasyz etý ekendigin tilge tiek etti, dep habarlaidy "Ult aqparat" Baq.kz agenttigine silteme jasap.
Nursultan Nazarbaev turǵyn úi problemasynyń barlyq memlekette bar ekenin aityp, elimizde bul máseleniń týyndaýyna ne sebep bolyp otyrǵanyn túsindirdi. Artynsha elimizde páterge qol jetkizýge múmkindik beretin tórt baǵdarlamanyń árqaisysyna toqtalyp ótti.
«Turǵyn úi problemasy barlyq memlekette bar jáne árdaiym bolatyny anyq. Bizdiń memleketimiz ýrbanizatsiialandyrylmaǵan. Halyqtyń 40%-y aýyldyq aimaqta tursa, aýyl úshin halyqtyń tek 20%-y qyzmet etip jatyr. Onyń ústine aýyl turǵyndary birtindep qalaǵa kóship kelýde. Birinshiden, elimizde baspana alýǵa jaǵdai jasaityn Turǵyn Úi Qurylys Jinaq banki bar. Úi alǵysy kelgen azamat qajetti somanyń 50%-yn osy bankke jinaidy. Al qalǵan somany atalǵan bank nesiege beredi. Osylaisha azamat páterge qol jetkizip, qalǵan qaryzdy shetinen ótep otyrady. Ekinshiden, biz jergilikti oryndaýshy ákimdikterge aqsha beremiz. Olar óz kezekterinde bul aqshany páter alǵysy kelgenderge nesie sekildi úlestiredi. Al páterdiń jańa ieleri onyń aqshasyn páteraqy tólegendei óteidi. Munymen qatar, múgedekter men ardagerlerge arnaiy jeńildikter qarastyrylǵan.
Úshinshi – jekemenshik qurylys. Bir kezderi aramyzdan «Maǵan 10 sotyq jer ber. Men ózim úi salaiyn» degen sekildi áńgime shyqqan bolatyn. Osyǵan orai, jekemenshik qurylysqa negizdelgen baǵdarlama oilastyrdyq. Memlekettiń aitary kelesidegidei: Adam óz úiin Betpaqdalaǵa, Jambyl oblysyndaǵy Moiynqum aýdanyna nemese Jańarqaǵa baryp salǵysy kelmeidi. Qurylys nysanynyń qala ortasynda boi kótergenin qalaidy. Al qala ishinde bos oryn joq. Sol sebepti, memleket úlken aimaqtardan 60 gektar jer qarastyrady. Osy kólemdegi jerge 600 úi salynýy tiis. Jáne úiler Shanhai qalasyndaǵydai emes, arasynda kósheler bolýy kerek. Iaǵni memleket óz tarapynan osy qurylys alańyn aldyn ala daiyndaidy. Ony jol, elektr qýaty jáne sýmen qamtamasyz etip, osy jerge óziń jinaǵan aqshaǵa úi sal deidi. Qurylystyń osyndai birneshe túri bar. Eger bir úiden eki adam jumys istese, ipotekany tólei alady. Sondyqtan baspanany tek jumys isteitin adam alatynyn umytpaiyq», - deidi Elbasy.
Sondai-aq, Nursultan Nazarbaev halyqty eńbekqor bolýǵa shaqyryp, memlekettiń eshkimdi tegin úimen qamtamasyz etýge mindetti emes ekenin aityp ótti.
«Úide otyryp alyp, bireý daiyn úidi tárelkege salyp ákelip beredi dep kútpeńizder. Mundaidy oiǵa almańyzdar. Búgingi naryq sharttarynyń negizinde memleket eshkimge tegin úi bere almaidy jáne berýge de mindetti emes. Memlekettik qyzmetkerler de osy júiede bolýlary kerek. Memleket jumys istep júrgen adamdarǵa kómektesip, páterdi az paiyzben satyp alýǵa jaǵdai jasaidy. Ásirese, ákimdikterge aqsha óte tómen paiyzben beriledi. Osynyń barlyǵyn memleket tarapynan kórsetilip jatqan kómek dep túsinýimiz qajet.
Al áleýmettik-turmystyq jaǵdaiy nashar, kópbalaly otbasylar osy tórt baǵdarlamanyń ishinen ózine yńǵailysyn tańdap, qatysqandary jón. Biz osynyń barlyǵyn qolymyzǵa qaryndash alyp otyryp eseptegen bolatynbyz. Memlekettiń basty mindeti – adamdardy jumyspen qamtamasyz etý. Al adam óz kezeginde jumys istep, aqsha tabýy tiis. Eshnárse ózdiginen kelmeidi. Eń bastysy, indýstriialandyrý talaptaryna sáikes jumys istegen adamnyń ipotekany tóleýge aqshasy jetedi», - deidi Prezident.
.jpeg)