Qazaqstannyń bolashaǵy aýyl sharýashylyǵynyń damýyna bailanysty bolady. Bul týraly Jer reformasy jónindegi komissiianyń 1-otyrysynda Senat depýtaty Aqylbek Kúrishbaev aitty, dep habarlaidy QazAqparat.
«Qazirgi ýaqytta Qazaqstan ekonomikasy negizinen jerasty paidaly qazbalardyń arqasynda damýda. Biraq, olar bir kezderi taýsylatyn, iaǵni jańartylmaityn tabiǵi resýrstar. Sondyqtan memleketimizdiń bolashaǵy aýyl sharýashylyǵynyń damýyna bailanysty bolady. Mine, sonda bolashaq urpaǵymyzǵa aýyl sharýashylyǵy maqsatyndaǵy jerlerdi paidalaný qoljetimdi bolýy kerek. Iaǵni, ózderiniń agrarlyq biznesin damytý úshin jer ielenýshilerden nemese latifýndisterden satyp almai, tikelei memleketten alý múmkindigine ie bolýy qajet», - dedi komissiianyń birinshi otyrysynda senator.
Onyń atap ótýinshe, búginde aýyl sharýashylyǵy maqsatyndaǵy jerlerge jekemenshiktiń bolmaýy agrarlyq salaǵa investitsiialar tartýdyń basty tejegishi degen pikir bar.
«Shynynda da, agroónerkásip keshenge investitsiialar tartý jaǵynan biz álemniń jetekshi agrarlyq elderinen kóp arta qalyp otyrmyz. Atap aitqanda, aýyl sharýashylyǵyndaǵy sheteldik investitsiialar kólemi Avstraliiada 1 gektar egistikke shaqqanda 422 dollardy, Kanadada 80 dollardy quraidy. Al Qazaqstanda 1 dollarǵa da jetpeidi. Iaǵni, 400 ese az. Shetelden investitsiia tartýdyń basty sharty aýyl sharýashylyǵy óndirisiniń turaqtylyǵy men joǵary rentabeldiligi bolyp sanalady. Bul eń aldymen memlekettiń tiimdi agrarlyq saiasaty esebinen qalyptasady. Basqasha aitqanda, eger bizdiń sharýashylyqtarymyz sheteldik fermerler siiaqty uzaq jáne arzan kredittermen, memlekettik qoldaýdyń tiimdi sharalarymen, sýbsidiialarmen, jeńildetilgen saqtandyrý júiesimen jáne ǵylymi-tehnologiialyq jetistiktermen qamtamasyz etilse, bizdiń de agrarlyq salamyz investitsiialyq suranysta bolar edi», - dedi Aqylbek Kúrishbaev.
