Foto: Sergei Malgavko / TASS
Qazaqstanda janar-jaǵarmai qymbattaýy múmkin. Buǵan sebep memleket benzin baǵasyn retteýden bas tartpaq, biraq Úkimet baǵanyń kúrt ósýine jol bermeýge ýáde berip otyr, dep habarlaidy Ult.kz.
Energetika ministrligi benzin baǵasyn retteýge qatysty buiryqtyń kúshin joiý týraly qujat jobasyn Ashyq NQA portalynda jariialady.
Ministrliktiń túsindirýinshe, Qazaqstandaǵy benzin men dizel otynynyń baǵasy álem boiynsha eń tómen mánderge ie.
"Mysaly, Qazaqstanda AI-92 benzininiń baǵasy litrine 205 teńge, Resei Federatsiiasynda 288 teńge, Qyrǵyzstanda 385 teńge, Ózbekstanda 489 teńgeni quraidy. Qazaqstanda dizel otyny litrine 295 teńge, Resei Federatsiiasynda 355 teńge, Qyrǵyzstanda 427 teńge, Ózbekstanda 528 teńge turady. Osylaisha, AI-92 benzininiń baǵasyndaǵy aiyrmashylyq 40%-dan 138%-ǵa deiin, dizel otynyna 20%-dan 79%-ǵa deiin jetedi. Bul tapshylyqty, salany jańǵyrtýdyń múmkin emestigin, otyndy ártúrli zańsyz shemalar arqyly shetelge áketýdi týdyrady", – delingen ministrliktiń túsindirme jazbasynda.
Energetika ministrligi janar-jaǵarmaiǵa baǵa belgileýdiń turaqty modeli saiasatyn júzege asyrýdy josparlaýda.
Bul saiasat:
suranys pen usynys arasyndaǵy naryqtyq teńgerimdi qurýǵa;
otyn tapshylyǵyn joiýǵa;
munai óńdeý salasyn jańǵyrtýdy yntalandyrýǵa;
jańa jumys oryndaryn qurýǵa;
uzaq merzimdi investitsiialardy tartýǵa baǵyttalǵan.
"Azamattardyń múddelerin qorǵaý úshin áleýmettik qoldaý sharalaryn kórsetý jalǵasady, al aýyl sharýashylyǵy óndirýshileri ashyq shemalar men qolaily baǵalar boiynsha dizel otynyna kepildi qol jetkize alady. Energetika ministrligi múddeli organdarmen birlesip naryqtaǵy baqylaýdy kúsheitedi, zańnamanyń oryndalýyn jáne otynnyń ishki naryqqa úzdiksiz jetkizilýin qamtamasyz etedi", – dep ýáde etti vedomstvo ókilderi.
