Tutynýshylar quqyǵyn qorǵaý komiteti «Bek Eir» kompaniiasyn tórtinshi ret sotqa berdi, dep habarlaidy "Ult aqparat".
Saýda jáne integratsiia ministrligine qarasty tutynýshylar quqyǵyn qorǵaý komitetiniń qyzmetkerleri «Bek Eir» aviakompaniiasy jasalmaǵan reisterdiń biletteri úshin aqshalai qarajattardy qaitarmaǵany boiynsha azamattardyń múddelerin qorǵaý jumystaryn jalǵastyrýda.
Osyǵan bailanysty Almaty qalasynyń Túrksib aýdanynyń soty tutynýshylar quqyǵyn qorǵaý komitetiniń tórtinshi talabyn qarastyryp jatyr.
Onyń talaby - aviatasymaldaýshydan quny 5 mln teńgeden asatyn 147 biletti satyp alǵan 86 jolaýshynyń qarjysyn qaitarý.
Aita keter jait, budan burynǵy úsh talaptyń nátijesi boiynsha sot sheshimderi mekemeniń jaǵynda boldy. Biraq kompaniia bul sheshimmen kelispei, apelliatsiialyq shaǵym bergenimen, sot óz sheshimin ózgertpedi.
Tutynýshylar quqyǵyn qorǵaý komiteti aqshalai qarajatty qaitarý boiynsha barlyq sharany qoldanady.
