Memleket basshysy Qasym-Jomart Toqaev Úkimetke elimizdiń barlyq densaýlyq saqtaý infraqurylymyna aýqymdy renovatsiia júrgizip, meditsinalyq mekemelerdiń materialdyq-tehnikalyq bazasyn jańǵyrtýdy tapsyrdy, dep habarlaidy ult.kz.
Aqordada ótken Meditsina qyzmetkeri kúnine arnalǵan saltanatty jiynda Prezident «Aýylda densaýlyq saqtaýdy jańǵyrtý» ulttyq jobasynyń alǵashqy kezeńi tabysty júzege asyrylǵanyn atap ótti.
Memleket basshysynyń aitýynsha, 2023 jyldan beri elimizde 655 jańa bastapqy meditsinalyq-sanitarlyq kómek kórsetý nysany salynǵan. Sonymen qatar biyl 32 aýdandyq aýrýhanany jańǵyrtý jumystary tolyq aiaqtalady.
«Bul azamattardy turǵylyqty jerde sapaly meditsinalyq kómekpen qamtamasyz etedi», – dedi Qasym-Jomart Toqaev.
Prezident elorda men óńirlerde mamandandyrylǵan ǵylymi institýttar, kópbeiindi aýrýhanalar, zamanaýi emhanalar jáne perinataldyq ortalyqtar salynyp jatqanyn aitty.
Soǵan qaramastan, densaýlyq saqtaý salasyndaǵy infraqurylym máselesi áli de ózekti kúiinde qalyp otyr. Prezidenttiń málimetinshe, elimizde paidalaný merzimi áldeqashan ótip ketken 14 myńnan astam nysan áli kúnge deiin halyqqa qyzmet kórsetýde.
Osyǵan bailanysty Memleket basshysy Úkimetke densaýlyq saqtaý júiesindegi eskirgen nysandardy kezeń-kezeńimen jańartyp, olardyń materialdyq-tehnikalyq múmkindikterin kúsheitý jóninde naqty tapsyrma berdi.
Prezidenttiń pikirinshe, meditsinalyq infraqurylymdy jańǵyrtý halyqqa kórsetiletin qyzmet sapasyn arttyrýǵa jáne azamattardyń zamanaýi meditsinalyq kómekke qoljetimdiligin qamtamasyz etýge múmkindik beredi.
