Memleket basshysy qazaqstandyqtardy Memlekettik rámizder kúnimen quttyqtady, dep habarlaidy ult.kz Aqordaǵa silteme jasap.
«Barshańyzdy Memlekettik rámizder kúnimen shyn júrekten quttyqtaimyn! Bul – qasietti Otanymyz – Qazaq eliniń árbir azamaty úshin mańyzy erekshe mereke. Biz osy kúni bairaǵymyzdy biikke kóteremiz. Sol arqyly eńseli, egemen el ekenimizdi kúlli álemge pash etemiz.
Qasterli rámizderimiz – ult qundylyqtarynyń jarqyn simvoly. Memleketimizdiń ár nyshany halqymyzdyń bolmys-bitiminiń kórinisi sanalady.
Eltańba – eldigimizdiń aishyqty belgisi. Ánuran – azattyǵymyzdyń aibyndy úni. Kók Týymyz – Táýelsizdik tumary. Tóbemizge kóterip, qadir tutatyn osy úsh rámizdi memlekettigimizdiń myzǵymas úshtaǵany desek, artyq bolmaidy.
Tarihqa úńilsek, jurtymyz árqashan bir týdyń astyna jinalyp, yntymaq-birligin saqtai bilgen. Qazir de elimiz aýyzbirshiligin nyǵaityp, alǵa qarai senimmen qadam basyp keledi», - dedi memleket basshysy.
