Memleket basshysy «Aibyn» HII halyqaralyq áskeri-patriottyq jastar jiynynda sóz sóiledi, dep habarlaidy ult.kz.
Prezident Qasym-Jomart Toqaev Aqmola oblysynyń Shýchinsk qalasynda ótip jatqan «Aibyn» HII halyqaralyq áskeri-patriottyq jastar jiynyna qatysty.
«Aibyn-2026» baǵdarlamasyna áskeri-sporttyq, intellektýaldyq, shyǵarmashylyq jáne áskeri-qoldanbaly sport túrleri boiynsha jarystar endi. Biylǵy jiyn Qazaqstannyń birneshe aimaǵynan, sondai-aq Ázerbaijan, Qyrǵyzstan, Resei jáne Ózbekstan elderinen kelgen 50-den astam komandanyń basyn qosty.
Memleket basshysy bul óskeleń urpaqtyń rýhyn shyńdaityn, olardy otanshyldyqqa tárbieleitin óte mańyzdy is-shara ekenin atap ótti.
– Bairaqty básekede elimizdiń eń myqty, eń jigerli jas sarbazdary laiyqty óner kórsetti. Sondai-aq Ázerbaijan, Qyrǵyzstan, Ózbekstan jáne Reseiden kelgen dostas, baýyrlas memleketterdiń jastary baq synady. Búgin men bárińizge zor rizashylyǵymdy bildiremin! – dedi Qasym-Jomart Toqaev.
Memleket basshysynyń aitýynsha, patriot bolý degenimiz – memlekettiń saiasaty men strategiiasyn is júzinde qoldaý, el igiligine úles qosý, týǵan jerdiń taǵdyry úshin jaýapkershilik alý.
– Biz Qarýly kúshterdi dáiekti túrde jańǵyrtýdy qolǵa aldyq. Armiiaǵa jáne áskeri bilim berý júiesine tsifrlyq tehnologiialar, jasandy intellekt pen daiarlyqtyń ozyq standarttary belsendi túrde engizilýde. Bizdiń negizgi mindetimiz – kásibi deńgeii joǵary áskerilerdi tárbieleýdiń tiimdi júiesin qalyptastyrý, – dedi Prezident.
Qasym-Jomart Toqaev elimiz óskeleń urpaqtyń jan-jaqty damýyna basa mán beretinin jetkizdi.
– Ásker qataryndaǵy qyzmet shynaiy patriottardy tárbieleitin mańyzdy, tipti, basty mektepke ainalǵany jón. Dál osy sebepti áskeri dástúrlerdi «Adal azamat – Sarbaz – Otan qorǵaýshy» qaǵidatyna sai jańǵyrtý jónindegi bastamaǵa qoldaý bildirdim. Budan bylai áskerge shaqyrý, ant qabyldaý jáne áskeri qyzmetten bosatý sekildi úsh kezeń memlekettik protokol tájiribesine sáikes jańa formatta, erekshe saltanatpen uiymdastyrylady. Mundai este qalarlyq rásimder atalǵan is-sharalardyń mán-mańyzyn arttyryp, urpaqtar sabaqtastyǵyn nyǵaitady. Sonymen qatar jastar arasynda jáne jalpy qoǵamda áskerdiń bedelin aitarlyqtai kóteredi, – dedi Memleket basshysy.
