Kezdesýde Qazaqstannyń Atom energiiasy jónindegi halyqaralyq agenttikpen yqpaldastyq perspektivasy, sondai-aq iadrolyq qaýipsizdikti qamtamasyz etý salasy boiynsha jahandyq kún tártibiniń ózekti máseleleri talqylandy, dep habarlaidy ult.kz.
Prezident Qazaqstan MAGATE-men uzaq jyldar boiǵy seriktestikti joǵary baǵalaitynyn, sondai-aq Rafael Grossidiń jetekshiligimen Uiym iadrolyq qaýipsizdikti nyǵaitýǵa jáne atom qýatyn beibit maqsatta qoldanýǵa úles qosqanyn atap ótti.
– Sizdiń 2023 jyly sáýir aiynda Qazaqstanǵa jasaǵan alǵashqy saparyńyz ózara bailanystardy damytýǵa tyń serpin berdi. Iadrolyq qarýsyzdaný jáne jappai qyryp-joiý qarýyn taratpaý máselesine qatysty ustanymymyz uqsas dep oilaimyn. Degenmen álemde asa kúrdeli ahýal qalyptasyp otyr. Bul jahandyq problemany sheshý joldaryn izdeýde kúsh biriktirýdi talap etedi, – dedi Memleket basshysy.
Qasym-Jomart Toqaev MAGATE-men yntymaqtastyqty tereńdetý týraly 2036 jylǵa deiingi jol kartasyna jáne iadrolyq meditsina men ǵylymdy damytý salasy boiynsha birqatar qujatqa qol qoiylǵanyn quptady.
Bas direktor Qazaqstannyń álemdegi iadrolyq qaýipsizdikti jáne jappai qyryp-joiatyn qarýdy taratpaý rejimin nyǵaitý baǵytyndaǵy is-qimylyna joǵary baǵa berdi
Sondai-aq Qasym-Jomart Toqaevtyń álemdegi abyroi-bedeline, iadrolyq qaýipsizdikti, dialog pen kópjaqty yntymaqtastyqty ilgeriletýde dáiekti ról atqaryp kele jatqanyna toqtaldy.
Agenttik jetekshisi elimizdi AES salý boiynsha ótken jalpyhalyqtyq referendýmnyń nátijesinde atom energiiasyn damytý baǵdarlamasynyń iske asyryla bastaýymen quttyqtady.
Prezident Qazaqstannyń iadrolyq qaýipsizdik pen memleketaralyq senimdi nyǵaitýǵa baǵyttalǵan jahandyq kúsh-jigerge qosylýǵa aldaǵy ýaqytta da beiil ekenin málimdedi.
Osy rette Qasym-Jomart Toqaev tiisti halyqaralyq ýaǵdalastyq bolǵan jaǵdaida, elimiz izgi nietti kózdep, Irannyń iadrolyq baǵdarlamasy tóńiregindegi máseleniń sheshilýine atsalysýǵa daiyn ekenin taǵy da rastady.
Rafael Grossi Qazaqstannyń jahandyq iadrolyq qaýipsizdikti nyǵaitý isindegi mańyzy men rólin atap ótip, elimizdiń igi bastamasyna qoldaý bildirdi. MAGATE basshysy yqtimal kelisimderdi júzege asyrý úshin Qazaqstan saiasi bedelge, tiisti infraqurylym men ǵylymi-tehnikalyq bazaǵa ie ekenin jetkizdi.
Sonymen qatar Prezident BUU Bas hatshysy laýazymyna úmitker Rafael Grossige sáttilik tiledi.
Qasym-Jomart Toqaev Qazaqstan Respýblikasy men Atom energiiasy jónindegi halyqaralyq agenttik arasyndaǵy yntymaqtastyqty nyǵaitýǵa eleýli úles qosqany úshin Rafael Grossidi I dárejeli «Dostyq» ordenimen marapattady
