Briýsselge resmi saparmen barǵan Prezident Qasym-Jomart Toqaev qazirgi ýaqytta Belgiiada bilim alyp, jumys istep jatqan Qazaqstan azamattarymen kezdesti, dep habarlaidy ult.kz.
Memleket basshysy áńgimelesý barysynda otandastarymyzdy jańa Konstitýtsiianyń qabyldanýymen quttyqtady.
– Jalpyhalyqtyq referendýmda halqymyz biraýyzdan, birtutas qoǵam bolyp Konstitýtsiiamyzdy qoldady. Óte keremet qujat, 1 shildede kúshine enedi. Ata zańymyz halqymyzdyń temirqazyǵy bolady. Sondyqtan barshańyzdy shyn júrekten jańa Konstitýtsiianyń qabyldanýymen quttyqtaimyn, – dedi Prezident.
Sonymen qatar Prezident shetelde bilim alyp, jumys istep júrgen otandastarymyzǵa qoldaý bildirdi.
– Elimizge sizder siiaqty bilimdi, kózi ashyq, kókiregi oiaý jastar qajet. Qai jerge barsam da jastarǵa qoldaý bildirip júremin. Shyn máninde, bul jai aityla salǵan sóz emes. Jastarǵa qoldaý kórsetý – memlekettiń uzaqmerzimdi saiasatynyń bir bóligi. Jastarymyz álemniń ár túkpirinde bilim alyp, eńbek etýde. Men Prezident retinde muny qoldaimyn. Sebebi qai jerde júrseńiz de, qazaq bolyp qalasyz. Biz ozyq, damyǵan, ádiletti el bolýymyz kerek. Osyndai eldiń negizin qalaý úshin bárimiz bir el, bir halyq bolyp atsalysýymyz kerek, – dedi Prezident.
Qasym-Jomart Toqaev elimizdiń jańa Negizgi zańynda bilim men ǵylymdy jáne innovatsiiany damytý memleket qyzmetiniń strategiialyq baǵyty retinde belgilengenin aitty. Sonymen qatar jastardy birneshe shet tilin meńgerýge shaqyrdy.
Otandastar oqý men jumystaǵy jetistikteri jóninde áńgimelep, keleshek josparlarymen bólisti. Atap aitqanda, KU Leuven ýniversitetiniń 3 kýrs stýdenti Álim-Seri Mahambátáli Belgiiadaǵy qazaqstandyq stýdentter qaýymdastyǵy, al Arýjan Bolatbekova Briýsseldegi Kazakh Speaking Club qyzmeti týraly baiandady.
Kezdesý sońynda Prezident Belgiiada turatyn stýdentter men Qazaqstan azamattaryna tabys tiledi.
