Memleket basshysy Qasym-Jomart Toqaev Bala quqyqtary jónindegi ýákil Dinara Zákievany qabyldap, balalardyń quqyqtaryn qorǵaý salasynda atqarylyp jatqan jumystar týraly aqparat aldy, dep habarlaidy ult.kz.
Kezdesý barysynda Dinara Zákieva biyl «Qazaqstan balalary» tujyrymdamasy qabyldanǵanyn baiandady. Qujat aiasynda densaýlyq saqtaý, bilim berý, áleýmettik qorǵaý jáne qaýipsizdik salalaryndaǵy balalar quqyqtaryn qamtamasyz etý sharalary júielengen.
Onyń aitýynsha, bes jylǵa arnalǵan is-qimyl jospary ázirlenip, oǵan áleýmettik qoldaýdy kúsheitý men bala quqyqtaryn qorǵaýǵa baǵyttalǵan 158 is-shara engizilgen.
Sonymen qatar óńirlik ákimdikter janynan Balalar quqyǵyn qorǵaý basqarmalaryn qurý jumysy aiaqtalyp, olardyń ókilettikteri ulttyq zańnamada bekitilgen. Qazirgi ýaqytta qajetti uiymdastyrý rásimderi júrgizilip jatyr.
Ýákildiń málimetinshe, biyl toǵyz óńirdegi jaǵdaiǵa monitoring jasalyp, balalardyń psihologiialyq saýlyǵyn qamtamasyz etý jáne quqyq buzýshylyqtardyń aldyn alý baǵytyndaǵy jumystardyń sapasy zerdelengen.
Kezdesýde psihologiialyq qoldaý ortalyqtarynyń qyzmeti men psihologiialyq saýlyqty baǵalaýdyń biryńǵai baǵdarlamasyn engizý máseleleri de talqylandy. Bul bastama erekshe nazar men qoldaýdy qajet etetin balalarǵa júieli kómek kórsetýge múmkindik bergen.
Dinara Zákieva sondai-aq 111 memlekettik bailanys ortalyǵynyń jumysyna toqtaldy. Onyń aitýynsha, mektepterde QR-111 júiesin engizý balalarmen tikelei bailanys ornatýǵa jáne olardyń quqyqtarynyń buzylý faktilerin anyqtaýǵa kómektesken.
2024 jyldyń qazan aiynan 2026 jyldyń maýsym aiyna deiin balalardan 167 myń habarlama men 4523 qońyraý túsken.
Kezdesý barysynda balalarǵa arnalǵan infraqurylymdy damytý, ásirese aýyldyq jerlerdegi nysandardy jaqsartý, sondai-aq ata-analardyń jaýapkershiligin arttyrý máseleleri de kóterildi.
Memleket basshysy «Qazaqstan balalary» tujyrymdamasyn tiimdi júzege asyrý úshin Bala quqyqtary jónindegi ýákil, Úkimet jáne jergilikti atqarýshy organdardyń kúsh-jigerin úilestirý mańyzdy ekenin atap ótti.
