Prezident – Qazaqstan Respýblikasy Qarýly Kúshteriniń Joǵarǵy Bas Qolbasshysy Qasym-Jomart Toqaev qorǵanys vedomstvosynyń basshylyq quramymen keńes ótkizdi, dep habarlaidy ult.kz.
Memleket basshysy ujymǵa jańa Qorǵanys ministrin tanystyrdy.
Jiyn Mańǵystaý oblysynda ótken oqý-jattyǵý kezinde qaza tapqan 14 áskeri qyzmetshini bir minýt únsizdikpen eske alýdan bastaldy.
Memleket basshysy bolǵan oqiǵaǵa qatań baǵa berdi
– Men qaza bolǵan árbir áskeri qyzmetshiniń ata-anasyna kóńil aityp, arnaiy jedelhatymdy joldadym. Qaitys bolǵan azamattardyń otbasylaryna barlyq qajetti kómek kórsetiledi. Olardyń eshqaisysy qoldaýsyz, kómeksiz qalmaidy, – dedi Qasym-Jomart Toqaev.
Prezidenttiń aitýynsha, beibit kúnde sarbazdardyń ómirin jalmaǵan bul qaiǵyly jaǵdaiǵa birinshi kezekte ofitserlerdiń, sonyń ishinde generaldardyń salǵyrttyǵy jáne kásibi biliksizdigi sebep boldy.
Qasym-Jomart Toqaev qaiǵyly oqiǵanyń mán-jaiyn ǵana emes, mundai oqý-jattyǵýdy josparlaýǵa ne túrtki bolǵanyn jáne qoiylǵan mindettiń qazirgi qaýip-qaterlerge qanshalyqty sai keletinin anyqtaýdy talap etti.
– Qarýly Kúshter basshylyǵy qordalanǵan túitkilderdi jyldar boiy sheshe almai keledi. Bul elimizdiń qorǵanys qabiletine nuqsan keltiredi. Ótken qaiǵyly oqiǵalardan sabaq almadyńyzdar. Atalǵan oqý-jattyǵý jiynynyń máni de, maqsaty da túsiniksiz. Ony kim ázirlep, bekitti? Bas shtabtyń róli qandai? Úilestirý jumystaryna nege mán bermegen? Nelikten oqý-jattyǵý jiynynda Áskeri-teńiz kúshteriniń bas qolbasshysy bolmaǵan? Jaýapsyzdyq, salǵyrttyq, kózboiaýshylyq beleń alǵan. Júieli jumys joq. Daǵdarys jaǵdaiyndaǵy is-qimyl jospary syn kótermeidi. Munyń bári – áskeri vedomstvo basshylyǵynyń nemquraidylyǵynyń saldary, – dedi Memleket basshysy.
Prezident oqý-jattyǵý jiynyna qatysqan áskeri qyzmetshiler tiisti jabdyqtarmen, sonyń ishinde arnaiy qutqarý keýdeshelerimen qamtamasyz etilmegenin aitty
Memleket basshysy jeke quramnyń qaýipsizdigine airyqsha nazar aýdardy.
Qasym-Jomart Toqaevtyń pikirinshe, Úkimettik komissiia oqý-jattyǵýdy ázirleý men ótkizýge, áskerdi qajetti jabdyqtarmen qamtamasyz etýge jáne qaýipsizdik talaptardyń saqtalýyna jaýapty barlyq laýazymdy tulǵanyń áreketine baǵa berýge tiis.
Budan bólek, Prezidenttiń ókimine sáikes Qorǵanys ministrligindegi isterdiń jai-kúiine keshendi tekserý bastaldy.
Tekserý barysynda áskeri qyzmetti uiymdastyrý, áskerdi jabdyqtaý, sondai-aq onyń materialdyq jáne qarjylyq turǵydan qamtamasyz etilýi jan-jaqty zerdelenedi.
Qaýipsizdik Keńesi Tóraǵasynyń orynbasary Aida Balaeva basqaratyn komissiia júieli sipat alǵan zań buzýshylyqtardy anyqtap, kimderdiń jaýapqa tartylatynyn aiqyndaýy qajet.
Memleket basshysy áskeri qyzmetshiler laýazymyna, shenine qaramastan jaýapqa tartylatynyn, zań boiynsha qatań jazasyn alatynyn eskertti. Atalǵan másele Prezidenttiń jeke baqylaýynda.
– Bul oqiǵa armiiada olqylyqtar óte kóp ekenin jáne kásibilik jetispeitinin anyq kórsetti. Áskerdi túbegeili reformalaýdy iske asyratyn ýaqyt keldi. Bul – kezek kúttirmeitin másele. Men osyǵan bailanysty kadrlyq sheshimder qabyldadym. Sizderge Qazaqstan Respýblikasynyń jańa Qorǵanys ministri Myrzahmetov Aidos Sákenulyn tanystyrǵym keledi. Aidos Sákenuly kúrdeli kezeńde qyzmetke kirisip jatyr. Jaýapkershilik – óte joǵary, aldaǵy mindetter – asa kúrdeli. Batyl sheshimder qabyldanýǵa tiis, – dedi Memleket basshysy.
Qasym-Jomart Toqaev qorǵanys vedomstvosynyń jumysyn túbegeili transformatsiialaý máselesine toqtaldy
– Jaqynda Qaýipsizdik Keńesi Apparatymen ótken jiynda áskeri salada atqarylatyn basym mindetterdi aiqyndadym. Bizdiń armiia ótken ǵasyrda qalyp qoiǵan. Sonymen qatar qolbasshylyq júiesin halyqaralyq úzdik tájiribege sai qaita qurý kerek. Keshendi tásil qoldaný qajet. Al ol úshin baǵyt-baǵdarymyz anyq bolǵany jón. Bul dúnietanymy keń, saýatty ofitserlerdiń ǵana qolynan keledi. Reformanyń maqsaty – jańa úlgidegi ásker jasaqtaý, – dedi Memleket basshysy.
Prezident armiiada tsifrlyq transformatsiia júrgizýdi, múmkindiginshe adamdy tehnologiiamen almastyrýdy tapsyrdy.
– Áskerdi damytýdyń jańasha tásilderi qajet. Taptaýryn sheshimder, aldamshy amaldar, qaǵaz júzinde bárin keremet etip kórsetetin ótirik esepter eshkimge qajet emes, – dedi Prezident.
Qorǵanys ministrine birqatar kezek kúttirmeitin mindet júkteldi.
Birinshi mindet – biýdjet qarajatynyń tiimdi jumsalýyn qamtamasyz etý.
– Bólingen qarjy memlekettiń qorǵanys qabiletin arttyryp, barynsha nátije berýge tiis. Maqsatsyz shyǵynǵa, talan-tarajǵa jol berilmeidi. Mundai áreketi áshkerelengenderdiń birde-bireýi jaýapkershilikten qutylmaidy, – dedi Qasym-Jomart Toqaev.
Ekinshi mindet – qazirgi zamanǵy qaýip-qaterlerdi eskere otyryp, Qarýly Kúshterdi reformalaý. Qaýipsizdik Keńesiniń Apparaty Qorǵanys ministrligimen birlesip, on kún ishinde áskerdi reformalaý jóninde arnaiy jospar ázirleýge tiis.
Sondai-aq Memleket basshysy mamandardy irikteý men baǵalaýdyń ashyq kriteriilerin engizgen jón dep sanaidy.
– Áskeri laýazymdarǵa basshynyń «óz adamdary» emes, tájiribeli jáne bilikti kadrlar usynylýǵa tiis, – dedi Prezident.
Úshinshi mindet – ásker qataryndaǵy ideologiia jáne tárbie jumysyn kúsheitý. Bul is Konstitýtsiianyń basty qaǵidattary men qundylyqtaryna sáikes júrgizilýge tiis.
Sondai-aq álemniń áskeri tarihy, ultymyz ben jahan elderiniń ozyq rýhani-mádeni jetistikteri keńinen dáriptelýi kerek.
Armiia kásibi daiarlyq pen bilimdi shyńdap, otanshyldyqqa baýlityn mektep bolǵany jón. Onda árbir áskeri qyzmetshiniń ómiri men qaýipsizdigi bárinen joǵary turýy qajet.
– Otan qorǵaý – ár azamattyń qasterli boryshy, qasietti paryzy. Áskeri qyzmetke ómirin arnaǵan ár azamat memlekettiń qamqorlyǵy men qoldaýyn aiqyn sezinýi kerek. Ásker – qorqynysh pen úreige toly jer bolmaýy kerek. Ásker – jas sarbazdardy, elimizdiń naǵyz otanshyl azamattaryn tárbieleýdiń burynǵy jáne qazirgi ozyq úlgileri ushtasqan kásibi deńgeii joǵary institýt bolýǵa tiis, – dedi Memleket basshysy.
Prezidenttiń paiymdaýynsha, BAQ áskeri qyzmet, ásirese, basshylyqtyń joǵary baǵasy men qoldaýyna ie bolǵan áskeri qyzmetshiler týraly obektivti aqparat taratqany jón.
Joǵarǵy Bas Qolbasshy naqty ári túsinikti, kezeń-kezeńimen reformalaý josparyn ázirleý mańyzdy ekenine nazar aýdardy. Ony kólemdi tujyrymdamaǵa nemese jol kartasyna ainaldyrýǵa bolmaidy. Reforma jospary qazan aiynyń ekinshi jartysynda ótetin Qaýipsizdik Keńesiniń otyrysynda qaralady.
Prezident Qaýipsizdik Keńesiniń Apparatyna áskerdi reformalaý úderisin úilestirýdi tapsyrdy.
