Memleket basshysy Qasym-Jomart Toqaev AQSh Qarjy korporatsiiasynyń halyqaralyq damý jónindegi atqarýshy direktory Ben Blekti qabyldap, meimanǵa iltipat tanytyp, bul sapar Vashingtonda qol jetkizilgen kelisimderdiń jalǵasy, sondai-aq AQSh-pen san qyrly yntymaqtastyqty tereńdetý jolyndaǵy mańyzdy qadam sanalatynyn atap ótti, dep habarlaidy ult.kz.
Memleket basshysynyń aitýynsha, Aq úi ákimshiligine Donald Tramp kelgennen bastap Vashington Astanamen jáne Ortalyq Aziia aimaǵymen yqpaldastyqty aitarlyqtai jandandyra túsken.
"Biz AQSh Prezidentiniń diplomatiiaǵa degen batyl kózqarasyn jáne pragmatikalyq ustanymyn tolyq qoldaimyz. Qazaqstan Amerikanyń Ibrahim kelisimderi, Beibitshilik keńesi, TRIPP bastamasy jáne basqa da negizgi jobalaryn ilgeriletýge belsendi atsalysýda. Birlesken kúsh-jigerimiz búginde burynǵydan da beki túsken keńeitilgen strategiialyq seriktestigimizge tyń serpin berdi. Sizdiń saparyńyz Qazaqstandaǵy aýqymdy saiasi jáne ekonomikalyq ózgeristermen tuspa-tus kelip otyr. Bul reformalar elimizdi resýrstarǵa táýeldi modelden bilimge baǵdarlanǵan ártarapty ekonomikaǵa kóshirýge baǵyttalǵan. Korporatsiiańyzdyń investitsiialyq basymdyqtary Qazaqstannyń damý kún tártibine sai keledi. Biz naqty ári ózara tiimdi yntymaqtastyqqa daiynbyz", – dedi Prezident.
Ben Blek qonaqjailyq kórsetkeni úshin Memleket basshysyna alǵys aityp, Almatyda Qazaqstannyń iskerlik qaýymdastyǵymen óte nátijeli ári mazmundy kezdesý ótkenine toqtaldy
Qasym-Jomart Toqaev atalǵan kezdesýlerdiń ekijaqty bailanystardy keńeitý turǵysynan ózektiligine jáne qol jetkizilgen ýaǵdalastyqtardy naqty iske asyrý qajettigine airyqsha nazar aýdardy.
Memleket basshysy Qazaqstan tarapy birlesken investitsiialyq jobalardy qolǵa alýǵa daiyn ekenin rastady.
Kezdesýde asa mańyzdy mineraldar, ózara kólik bailanysy, agroónerkásip kesheni, tsifrlandyrý jáne jasandy intellekt salalaryndaǵy yntymaqtastyq perspektivasy talqylandy.
Sonymen birge Qazaqstanda AQSh Qarjy korporatsiiasynyń halyqaralyq damý jónindegi turaqty ókildigin ashý máselesi qaraldy.
