Qazaqstan Prezidenti Investitsiialar jáne damý ministri Jeńis Qasymbekti qabyldady, dep habarlaidy "Ult aqparat" Aqordaǵa silteme jasap.
Kezdesýde Nursultan Nazarbaev Investitsiialar jáne damý ministrligine bekitilgen memlekettik jáne salalyq baǵdarlamalardy iske asyrýdyń mańyzdylyǵyna nazar aýdaryp, olardyń oryndalýynyń aralyq qorytyndylary jóninde aitty.
– Indýstriialandyrý baǵdarlamasy júzege asyrylǵan jyldarda 5,2 trillion teńgeni quraityn 1060 joba iske qosyldy. Sonyń arqasynda 100 myńnan astam jumys orny ashyldy. Osy baǵdarlama iske asyrylǵannan beri júzege asqan jobalar 8 trillion teńgeniń ónimin berdi. Bul – elimiz úshin asa mańyzdy jetistik. Biz buǵan deiin óndirilmegen ónimniń 500 túrin shyǵaramyz, – dedi Elbasy.
Memleket basshysy «Nurly jol» infraqurylymdyq damý baǵdarlamasyn júzege asyrýdyń nátijelerine nazar aýdardy.
– 2010 jyldan beri respýblikalyq mańyzy bar 5 myń shaqyrym joldyń qurylysy men qaita jóndeý jumystary júrgizildi. 2020 jylǵa deiin taǵy 4500 shaqyrym jol iske qosylady. Qazir respýblikalyq avtomobil joldarynyń 85 paiyzy jaqsy kúide. Batys Eýropa – Batys Qytai jobasy jáne Astana – Temirtaý, Almaty – Qapshaǵai, Beineý – Shetpe, Kókshetaý – Petropavl baǵyttary boiynsha joldar paidalanýǵa berildi. Sondai-aq, Ertis ózeni arqyly ótetin Ortalyq Aziiadaǵy eń iri kópir salyndy. Osy jobalardy iske asyrýǵa 75 myń adam tartyldy. Bul rette, barlyq qurylys materialdarynyń 90 paiyzy Qazaqstanda jasalǵan, – dedi Nursultan Nazarbaev.
Sonymen birge, Qazaqstan Prezidenti «Quryq» teńiz porty men «Qorǵas» shekara mańy yntymaqtastyǵy halyqaralyq ortalyǵynyń ekonomikalyq mańyzdylyǵyn atap ótti.
Budan bólek, Elbasy «Nurly jer» baǵdarlamasynyń iske asyrylý nátijelerine toqtalyp, onyń aiasynda 10 million sharshy metrden astam turǵyn úi salynǵanyn aitty.
– 9 oblysta turǵyn úi qurylysy júrgizilip jatyr. Barlyq baǵdarlamalar halyqtyń turmysyn jaqsartýǵa arnalǵan. Jinaqtaǵanymyzdyń bárin qazaqstandyqtardyń ál-aýqatyn arttyrýǵa baǵyttadyq, – dedi Memleket basshysy.
Sondai-aq, Qazaqstan Prezidenti ministrliktiń basshylyǵy tarapynan erekshe mán berýdi qajet etetin jekelegen máselelerge toqtaldy.
– Indýstriialandyrý jónindegi memlekettik baǵdarlama áli de ekonomikamyzdyń ártaraptyǵyn qamtamasyz ete almai otyr. Óńdeý ónerkásibiniń ishki jalpy ónimdegi úlesi aitarlyqtai ózgergen joq. Jalpy, qoiylǵan mindetterdi oryndaýǵa qajetti barlyq jaǵdai bar. Siz ekonomikalyq jáne áleýmettik basymdyqtardy iske asyrýǵa tolyq jaýaptysyz, – dedi Nursultan Nazarbaev.
Memleket basshysy elimizdi odan ári damytyp, Qazaqstan halqynyń ál-aýqatyn arttyrýǵa baǵyttalǵan barlyq baǵdarlamalardy iske asyrýdyń mańyzdylyǵyn atap ótti.
Sońynda Elbasy birqatar naqty tapsyrma berdi.
.jpeg)