Foto: Aqorda
Prezident Qasym-Jomart Toqaev shet memleketterden kelgen mártebeli meimandarmen jáne jurtshylyqpen birge V Dúniejúzilik kóshpendiler oiyndarynyń saltanatty ashylý rásimin tamashalady, dep habarlaidy Aqordanyń baspasóz qyzmeti.
«Astana Arena» stadionynda ótken sharaǵa Ózbekstan Prezidenti Shavkat Mirziioev, Qyrǵyzstan Prezidenti Sadyr Japarov, Túrikmenstan Halk Maslahatynyń tóraǵasy Gýrbangýly Berdimuhamedov, Tatarstan Respýblikasynyń Raisy Rýstam Minnihanov, Saha Respýblikasynyń basshysy Aisen Nikolaev, Mońǵoliianyń burynǵy prezidenti Enhbaiar Nambaryn, Dúniejúzilik etnosport konfederatsiiasynyń prezidenti Bilál Erdoǵan, sondai-aq IýNESKO, AÓSShK, BUU Dúniejúzilik týrizm uiymy, Túrki memleketteri uiymy, TÚRKSOI, Túrki investitsiialyq qory, Túrki memleketteriniń Parlamenttik assambleiasy, Islam sport qaýymdastyǵy, Azyq-túlik qaýipsizdigi jónindegi Islam uiymynyń basshylary, Eýropa Odaǵynyń Ortalyq Aziiadaǵy arnaiy ókili jáne basqa da resmi tulǵalar qatysty.
Dúbirli dodanyń ashylý saltanatynda qazaq jerin meken etetin túrli etnos ókilderiniń balalary Qazaqstan Respýblikasynyń Týyn alyp shyqty. Budan keiin elimizdiń Ánurany shyrqaldy.
Qalyptasqan dástúr boiynsha jarysqa qatysýshy memleketter sportshylarynyń sherýi ótti. Biylǵy Kóshpendiler oiyndaryna Aziiadan, Eýropadan, Soltústik jáne Ońtústik Amerikadan, Afrikadan, sondai-aq Avstraliiadan sportshylar keldi.
Saltanatty jiynda Memleket basshysy Qasym-Jomart Toqaev arnaiy sóz sóilep, álemdik aýqymda ótip jatqan airyqsha mańyzdy is-sharaǵa qatysý úshin Qazaqstanǵa kelgen baýyrlas memleketterdiń basshylaryna, mártebeli meimandarǵa jáne sportshylarǵa shynaiy alǵysyn jetkizdi.
Prezident kóshpendiler órkenieti dúniejúzi tarihynda óshpes iz qaldyrǵan órkeniet ekenin airyqsha atap ótti.
"Uly dala kóshpendileri ejelden baitaq Eýraziiany meken etken. Olar jahandyq damý úderisine túbegeili ózgeris ákeldi, sol zamandaǵy ozyq tehnologiianyń iesi boldy. Kóshpendiler bes myń jyl buryn jylqyny qolǵa úiretti. Dúnieni dúbirletken salt attylar mádenietin qalyptastyrdy. Qýatty qarý-jaraq pen ǵajaiyp zergerlik buiymdar jasap shyǵardy. Saq dáýiriniń Altyn adamdary – sonyń aiqyn dáleli. Qazaq jerinen ál-Farabi, Qoja Ahmet Iasaýi syndy ǵulamalar shyqqan. Olar ilim-ǵylymnyń damýyna orasan zor úles qosty. Bizdiń babalarymyz alyp memleketter qurdy, úlken qalalar saldy. Uly dalada Otyrar, Túrkistan, Taraz, Saraishyq siiaqty sáýletti shaharlar boi kóterdi. Kóshpendi jurt batys pen shyǵysqa kópir bolyp, túrli mádeniettiń jaqyndasýyna áser etti. Osy jerde ejelgi Ǵun imperiiasy, odan soń Túrik qaǵanaty saltanat qurdy. Olardyń dańqty jolyn Altyn Orda men Qazaq handyǵy jalǵastyrdy", – dedi Qasym-Jomart Toqaev.
Memleket basshysy Kóshpendiler oiyny babalar amanat etken qasterli murany kózdiń qarashyǵyndai saqtap, jas býynǵa tabystaý maqsatynan týǵan biregei joba ekenin aitty.
"On jyl buryn osy jarysty alǵash uiymdastyrǵan qyrǵyz baýyrlarǵa alǵys aitamyn. Bul – ulttyq sport túrlerinen ótetin álemdegi eń iri doda. Ony Kóshpendiler olimpiadasy deýge bolady. Bul oiyndar dala órkenietin jer jahanǵa pash etedi. Sport – ózara qurmet pen syilastyq simvoly. Sporttyń basty missiiasy – halyqtar dostyǵyn nyǵaitý. Qazaqstan búkil álemge beibitshilik pen kelisim mekeni retinde tanymal. Elimizde túrli etnos ókilderi tatý-tátti ómir súrip jatyr. Biz alys-jaqyn sheteldiń bárimen tyǵyz bailanys ornattyq. Basqa memleketter de ózara dostyq qatynasta bolǵanyn qalaimyz. Sondyqtan Kóshpendiler oiyndary yntymaǵymyzdy bekemdei túspek", – dedi Prezident.
Tórtkúl dúnieni jailaǵan kóshpendiler órkenietiniń bai mádenieti men taǵylymdy tarihyn, salt-dástúrin pash etip, adamzat balasyn ortaq úiimiz – Jer anany saqtaýǵa úndegen ashylý saltanaty birneshe epizodqa ulasty.
Sonymen qatar saltanatty jiynda V Dúniejúzilik kóshpendiler oiyndaryn uiymdastyrý komitetiniń tóraǵasy Roman Skliar, Dúniejúzilik etnosport konfederatsiiasynyń prezidenti Bilál Erdoǵan sóz sóiledi.
