Memleket basshysy Qasym-Jomart Toqaev Shveitsariia Prezidenti Gi Parmelanmen kelissóz júrgizdi, dep habarlaidy "Ult aqparat" Aqordaǵa silteme jasap.
Jeneva qalasyndaǵy Áýlie Petrdiń Kafedraldy soborynyń aldynda ótken resmi kezdesýden keiin eki eldiń basshylary kelissóz júrgizdi.
Qasym-Jomart Toqaev pen Gi Parmelan bir-birine resmi delegatsiialardyń múshelerin tanystyrdy. Sodan keiin eki eldiń ánurandary shyrqaldy. Prezidentter Shveitsariianyń týyna qurmet kórsetip, Qurmet qaraýylyn boilai ótti.
Saltanatty rásimnen keiin memleketter basshylary shaǵyn jáne keńeitilgen quramda kezdesýler ótkizdi.
Ózara senim jaǵdaiynda ótken kezdesýde memleketter basshylary Qazaqstan men Shveitsariia arasyndaǵy saiasi, saýda-ekonomikalyq, investitsiialyq, qarjy salalaryndaǵy kópjosparly yntymaqtastyqtyń ahýaly men perspektivalaryn jan-jaqty talqylady.
Budan bólek eki el basshylary Bretton-Výd institýttary, halyqaralyq uiymdar aiasyndaǵy ózara yqpaldastyqty qarastyryp, aimaqtyq kún tártibindegi máselelerdi, onyń ishinde Aýǵanstandaǵy jaǵdai men osy elge gýmanitarlyq kómek kórsetý máselesin sóz etti.
Sonymen qatar pandemiiaǵa jáne klimattyń ózgerýine qarsy kúreske, Ortalyq Aziiadaǵy sý diplomatiiasyna qatysty ózekti máseleler jóninde pikir almasty. Qasym-Jomart Toqaev pen Gi Parmelan saiasi jáne ekonomikalyq bailanystardyń oń qarqynyn atap ótip, ekijaqty bailanystardyń barlyq baǵyty boiynsha ózara tiimdi yntymaqtastyqty odan ári damytýǵa múddeli ekenderin bildirdi. Memleket basshysy Shveitsariiamen jan-jaqty qatynastardy damytýǵa basa mán beretinin jáne osy eldi Qazaqstannyń Eýropadaǵy mańyzdy saiasi ári ekonomikalyq áriptesi sanaitynyn aitty.
Sonymen qatar Qasym-Jomart Toqaev Gi Parmelanǵa Qazaqstanda júrgizilip jatqan aýqymdy saiasi jáne ekonomikalyq reformalar jóninde aitty. Eki el basshylary aýyl sharýashylyǵy, kólik jáne logistika, mashina jasaý, farmatsevtikalyq ónerkásip jáne «jasyl» jobalar salaryndaǵy birlesken jumystar úshin zor áleýet bar ekenin aitty.
Kelissóz qorytyndysy boiynsha memleketter basshylarynyń qatysýymen birqatar úkimetaralyq jáne kommertsiialyq kelisimge qol qoiyldy.
1. Qazaqstan Respýblikasynyń Úkimeti men Shveitsariia Konfederatsiiasy Federaldyq Keńesi arasyndaǵy baǵaly metaldardan jasalǵan buiymdardaǵy synamalyq tańbany ózara moiyndaý jónindegi kelisim;
2. 1994 jylǵy 12 mamyrda Almaty qalasynda Qazaqstan Respýblikasynyń Úkimeti men Shveitsariia Federaldyq Keńesi arasynda qol qoiylǵan saýda-ekonomikalyq yntymaqtastyq jónindegi kelisim hattamasy (Saýda qyzmetterin ishki retteý qaǵidalary);
3. «Qazaqstan temir joly» UK» AQ men «Stadler CIS AG» kompaniiasy arasyndaǵy strategiialyq yntymaqtastyq jónindegi kelisim.
