Foto: Aqorda
Qasym-Jomart Toqaevqa kompaniianyń biyl atqarǵan jumysynyń aldyn ala nátijeleri men investitsiialyq baǵdarlamalardy iske asyrýdyń negizgi baǵyttary tanystyryldy. Kompaniia qyzmetinde oń dinamika baiqalady. Eki jylda bolat óndirisi 22 paiyzǵa, kómir kontsentraty 26 paiyzǵa, temir keni 32 paiyzǵa artty. Ónimniń ózindik quny 28 paiyzǵa arzandap, shyǵarylatyn markalardyń túri 260-tan 350-ge deiin ulǵaidy, dep habarlaidy Ult.kz.
Andrei Lavrentev 9 iri investitsiialyq jobadan turatyn keshendi baǵdarlamany júzege asyrý jaiynda baiandady. Bul bastama eldegi bolat óndirisin júielep, metall prokaty importyn tómendetýdi kózdeidi. Budan bólek, bolattyń joǵary sapaly jańa markalaryn, sonyń ishinde atom elektr stantsiiasynyń qurylysyna arnalǵan ónim shyǵarý jolǵa qoiyla bastady.
Prezidentke kómir jáne taý-ken baǵytyn damytý baǵdarlamasy tanystyryldy. Eńbek qaýipsizdigi men áleýmettik bastamalarǵa basa mán berildi. Qarmet kompaniiasyna qarasty meditsinalyq jáne bilim berý uiymdary jańǵyrtylyp jatyr. Kompaniia men kásipodaqtar arasynda jańa ujymdyq kelisimshart jasaldy. Qujat 35 myń eńbekkerge áleýmettik kepildik berýdi qarastyrady.
Memleket basshysyna Qarmet janynan iri metallýrgiialyq klaster qurylyp jatqany týraly aityldy. Bul shaǵyn jáne orta kásiporyndardyń shikizatty tereń óńdeýmen ainalysýyna múmkindik beredi. Baǵdarlama «Báiterek» ulttyq investitsiialyq holdingimen birge iske asyrylmaq. Sondai-aq mashina jasaý zaýyttarynyń óndiris barysynda otandyq bolatty paidalanýy boiynsha júieli jumys júrgizilip jatyr.
Kezdesý sońynda Prezident Qarmet metallýrgiia kesheninde atqarylǵan jumysqa oń baǵasyn berip, damý josparyna qoldaý bildirdi. Sonymen qatar kásiporyndy jan-jaqty jańǵyrtý, áleýmettik máselelerdi sheshý, ekologiialyq jaǵdaidy jaqsartý, mashina jasaý óndirisin jandandyrý sharalaryn jalǵastyrýdyń mańyzyna toqtaldy.
