Foto: Almaty ákimdigi
Memleket basshysy Qasym-Jomart Toqaev kórnekti aqyn, qoǵam qairatkeri Oljas Súleimenovti 90 jas mereitoiymen quttyqtady, dep habarlaidy Ult.kz.
Prezidenttiń arnaiy quttyqtaý hatyn Almaty ákimi Darhan Satybaldy aqynnyń shańyraǵyna baryp tabystady.
Quttyqtaý hatynda Memleket basshysy Oljas Súleimenovtiń tek Qazaqstanda ǵana emes, halyqaralyq deńgeide de bedeldi tulǵa ekenin atap ótti. Onyń tereń oily poeziiasy men gýmanistik ustanymy ulttyq mádeniet pen qoǵamdyq-saiasi oidyń altyn qoryna ainalǵany erekshe aityldy.
— Sizdiń biregei shyǵarmashylyǵyńyz qazaq halqynyń tarihi sanasyn jańǵyrtyp, rýhani keńistigin keńeitti. Siz qaldyrǵan mura – ulttyń ǵana emes, adamzattyń ortaq igiligi, — delingen Prezident joldaýynda.
Kezdesý barysynda qala ákimi qalamgerdiń ádebietke, qoǵamdyq oiǵa jáne iadrolyq qarýǵa qarsy qozǵalysqa qosqan ólsheýsiz úlesin erekshe atap ótti. Ásirese, Súleimenov bastamashy bolǵan «Nevada–Semei» qozǵalysynyń iadrolyq synaqtarǵa qarsy kúrestegi tarihi róline toqtaldy. Bul qozǵalys álemdik antiiadrolyq qozǵalystyń simvolyna ainalyp, Semei poligonynyń jabylýyna tikelei yqpal etkeni belgili.
Oljas Súleimenov — XX–XXI ǵasyrlar toǵysyndaǵy qazaq rýhaniiatynyń iri tulǵasy. Ol tek aqyn ǵana emes, oishyl, túrkitanýshy, diplomat retinde de álemdik deńgeide tanyldy. Onyń shyǵarmalary kóptegen tilge aýdarylyp, halyqaralyq oqyrmannyń joǵary baǵasyna ie boldy.
Búgin ult maqtanyshyna ainalǵan qalamger 90 jasqa tolyp otyr. Bul mereitoi – bir adamnyń ǵana emes, tutas dáýirdiń, rýhaniiattyń saltanaty.
