Qazaqstan Prezidenti Nursultan Nazarbaev Muzafar Álimbaevtyń qaitys bolýyna bailanysty týǵan-týysqandary men jaqyndaryna kóńil aitý jedelhatyn joldady, dep habarlaidy "Ult aqparat" Aqordaǵa silteme jasap.
Memleket basshysy kórnekti aqyn, Uly Otan soǵysynyń ardageri Muzafar Álimbaevtyń dúnieden ótkeni týraly habardy zor kúizelispen qabyldady.
Jedelhatta Muzafar Álimbaevtyń qazaq ádebietin damytýǵa jáne Qazaqstannyń óskeleń urpaǵyn tárbieleýge baǵa jetpes úles qosqany atap ótilgen.
«Keńestik kezeńde ol qazaq ádebietiniń alyptarymen qanattasa júrip, Otan igiligi jolynda jemisti eńbek etti. Kóptegen jyr jinaqtary men án mátinderiniń avtory atandy. Ol otyz jylǵa jýyq balalardyń súiikti «Baldyrǵan» jýrnalynyń redaktory bolyp, ana tilimizdiń damýyna jáne búldirshinderimizdiń durys tálim-tárbie alýyna laiyqty úles qosty. Qalyń jurtshylyq úshin onyń halqymyzdyń maqal-mátelderin jinaqtap, zertteýdegi eńbeginiń mańyzy zor. Sondai-aq, ol jurt árdaiym aityp júretin kóptegen qanatty sózder men sóz tirkesterin ómirge ákeldi. Muzafar Álimbaevtyń esimi men eńbegin halqymyz árdaiym jadynda saqtaidy dep senemin», – delingen jedelhatta.
.jpeg)